-
2017 оны 8 сарын 23
Энэ онд улсын хэмжээгээр 393.6 мянган га-д үр тариа, үүнээс 367.2 мянган га-д буудай, 14.9 мянган га-д төмс, 7.5 мянган га-д хүнсний ногоо, 78.2 мянган га-д тосны ургамал, 28.2 мянган га-д тэжээлийн ургамал, 1.9 мянган га-д эмийн ургамал, нийтдээ 524.3 мянга га-д тариалалт хийжээ.
-
2017 оны 8 сарын 23
Завхан аймгийн Алдархаан сумын Богдын гол багийн “Өвтийн-Амны” гарманд Богдын голын усанд нэг зорчигчтой 35-90 ЗАА улсын дугаартай ачааны автомашин суусан тухай дуудлагаар /2017.08.22/ аймгийн Онцгой байдлын газрын алба хаагчид ажиллаж автомашиныг шөнийн 02:20 цагт уснаас татан гаргажээ.
-
2017 оны 8 сарын 23
Монгол Улсын Их Сургуулийн Сэтгүүл зүй, олон нийтийн харилцааны тэнхимийн багш, доктор, дэд профессор, сэтгүүл зүйн нэрт эрдэмтэн Чойжилжавын Чойсамба 2017 оны 8 дугаар сарын 23-ны өдөр таалал төгсөж Монголын сэтгүүл зүйн салбарт хүнд гарз учирлаа.
-
2017 оны 8 сарын 23
Нийслэлийн Авто замын сангийн хөрөнгө оруулалтаар Налайх дүүргийн гол замууд болох Даваажав, Дамдин, Найрамдлын гудамжны 1,3 км авто замын өргөтгөл шинэчлэлтийн ажлыг хийхээр болсон. Тус замын гүйцэтгэгчээр “Эко тогтол” ХХК шалгарсан бөгөөд 2.8 тэрбум төгрөгийн төсөвт өртгөөр 2017 оны 10 дугаар сарын 01-нд хүлээлгэн өгөхөөр гэрээ байгуулсан ч ажлын хугацаанаас нь өмнө дуусгаж, өнөөдөр нээлтээ хийлээ. Хуучин 2 эгнээ байсан авто замыг 14 метр өргөнтэй 4 эгнээ болгон шинэчилж, 3 метр өргөнтөй явган хүний зам, гадаргууны ус зайлуулах байгууламж, гэрэлтүүлэгийг цогцоор нь шийдэж, иж бүрэн замын ажлыг хүлээлгэн өгч байна.
-
2017 оны 8 сарын 23
Засгийн газрын энэ сарын 17-ны өдрийн хурлаар Өмнөговь аймгийн Ханбогд сумын Цагаан хадан дахь Гаалийн хяналтын талбайн үйл ажиллагааг хаахаар шийдвэрлэсэн билээ. Харин энэ асуудлаар Өмнөговь аймгийн Засаг дарга өчигдөр мэдээлэл хийж уг шийдвэрийг буруу хэмээн мэдэгдсэн юм. Тэгвэл энэ талаар Автотээврийн үндэсний төвийн дэд захирал Ш.Батсайхан тайлбар өгчээ.
-
2017 оны 8 сарын 23
Авто худалдааны цогцолборын орлогч дарга Ц.Гүрбадам ”Авто худалдааны цогцолбор нь 6,375 зогсоолтой. Үүнээс 1,200 нь эзэддээ оччихсон байгаа.
Улаанбаатар хотод авто машин, сэлбэгийн худалдаа хийдэг есөн зах, 102 цэг үйл ажиллагаа явуулж байна. Эдгээр газрыг нэгтгэж, нэг цогцолборт төвлөрүүлэх нь олон давуу талтай.
Авто цогцолборт машины дугаар үйлдвэрлэх үйлдвэр, банк гэх мэт шаардлагатай бүх газрууд бий. Тэгэхээр иргэдэд нэг дор бүх үйлчилгээг авах боломж бүрдэж байгаа юм” гэлээ.
-
2017 оны 8 сарын 23
Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү Европийн сэргээн босголт хөгжлийн банкны Суурин төлөөлөгч Ирина Кравченкотой өнөөдөр уулзлаа.
-
2017 оны 8 сарын 23
Монголын цэргийн нисэх хүчний буурал түүхэнд Ч.Шагдарсүрэн, Д.Дэмбэрэл, В.А.Судец, И.Г.Маны, Р.Самдан, Д.Лувсандамба, Ц.Мөнхөө, М.А.Судник, Ф.И.Андрианов нарын нэр алдраа дуурсгасан орос, монголын олон нисгэгч, нисэхийн ажилтан байсны нэг нь Дэмбэрэлийн Жамбаа байжээ. Энэ хүний тухай төдийлэн дурсдаггүй ч, байгуулсан гавьяат үйлс нь даанч арилшгүй ул мөрийг үлдээсэн учир баатарлаг энэ нисгэгчийг мөнхжүүлэх үйлсэд нэгэн үзүүрт сэтгэлээр хүчин зүтгэсэн хүмүүс гэвэл бэлтгэл хурандаа Я.Даваасамбуу, нисгэгч, зохиолч Т.Батжаргал нар билээ. Т
Дэмбэрэлийн Жамбаа Засагт хан аймгийн Ахай бэйсийн хошуу, одоогийн Хөвсгөл аймгийн Тосонцэнгэл сумын нутагт 1906 онд төржээ. 1926 оны 10 дугаар сарын 26-ны өдөр цэргийн албанд татагдаж, эвлэлийн гишүүн Д.Ламжав, Ч.Шагдарсүрэн, Б.Батцэрэн нарын хамт ЗХУ-ын мэргэжилтнийг дагалдан нисэх онгоцны моторчин, дархан зэрэг мэргэжил эзэмшицгээжээ. Улмаар тэд ЗХУ-ын Оренбург хотын, маршал К.В.Ворошиловын нэрэмжит цэргийн нисгэгчийн дунд сургуульд суралцаж, 1932 онд “Р-5” онгоцны бага нисгэгчээр төгсчээ. Ч.Шагдарсүрэн, Б.Батцэрэн нар эх орондоо ирж, нислэгийн ур чадвар, хэлний мэдлэгээр бусдаасаа илүү байсан Д.Жамбааг сургууль нь авч үлдсэн байна. Ийнхүү тухайн үед ЗХУ-ын нисэх хүчинд шинээр зэвсэглэлд орсон “И-5” хэмээх сөнөөгч онгоцны нисгэгчийн сургалтад Орос нөхдийн хамт хамрагдан төгсч, сөнөөгч онгоцны анхны монгол нисгэгч болж алдарших их хувь тавилан Дэмбэрэлийн Жамбаад тохиожээ.
Д.Жамбаа нь тэр үед манай нисэх хүчинд ашиглагдаж байсан “Ю-13”, “Ю-33”, “К-5”, “Ган-3”, “Р-1”, “Р-5”, “У-1”, “У-2” зэрэг онгоцоор ниссэн, багш нисгэгч, Ардын цэргийн анхны хурандаа нарын нэг байжээ. Д.Жамбаа, Ч.Шагдарсүрэн нар “Р-1” онгоцоор Улаанбаатар-Баянтүмэн-Тамсагбулаг хүртэл хоёр талдаа 2000 гаруй километр агаарын замыг анх нээсэн алдартнууд байж. Мөн 1935 онд Улаан-Үдээс Д.Жамбаа, Ч.Шагдарсүрэн, Б.Батцэрэн нар 11 “Р-1”, 4 “По-2” онгоцыг Улаанбаатарт авчрах ажлыг онц чадварлагаар гүйцэтгэсэн нь Монгол нисгэгчдийн гадаад оронд хил дамнан ниссэн анхны гадаад нислэгийн эхлэл байв. 1936 оноос манай улсын зүүн хил хязгаарын байдал нэн түгшүүртэй болж, Японы зүгээс заналхийлэл үзүүлэх нь ихэсч, улмаар 1936 оны 3 дугаар сарын 29-ний өдөр Бүх цэргийн жанжин Г.Дэмидийн тушаалаар Тамсагбулагаас Д.Жамбаа, Д.Дэмбэрэл нар “Р-5” онгоцоор 20 ширхэг бөмбөг, 2400 сум авч нисчээ. Тэд 1000 метрийн өндрөөс дайсанд ойртож, анхны бөмбөгөө хаясанд дайсны нэг машин өртжээ. Үүндээ урамшин дайралтаа цааш үргэлжлүүлэн байлдаж, пулемётоор галлаж, дахин нэг машиныг жагсаалаас гаргав. Ийнхүү байлдаан эхлээд хагас цаг хэртэй болж байтал Д.Жамбаагийн онгоцны хөдөлгүүрийн эд анги дайсны суманд өртөж, гэмтсэн учир өөрийн хилийн орчимд аргагүйдсэн буултыг амжилттай хийжээ. Нисгэгч Д.Дэмбэрэл дайралтаа ганцаараа үргэлжлүүлж, 2 цаг гаруй байлдаж, сум, галт хэрэгсэл нь дуусчээ. Энэ өдрийн байлдаанд Д.Жамбаагийн онгоц дайсны суманд 30 удаа, Д.Дэмбэрэлийн онгоц 29 удаа оногдсоноос өөр онцын хохирол амсаагүй байна. Харин Япон, Манжийн талаас 4 автомашин 100 шахам хүн алагдаж, шархджээ. Нисгэгч Д.Жамбаа нисэх бригадын байлдааны нэгдүгээр Отрядын дарга, Жанжин штабын нисэх тусгай Отрядын анхны даргаар ажиллахдаа 1934, 1936 онуудад Байлдааны гавьяаны Улаан тугийн I, II зэргийн одонгоор шагнуулсан Монголын анхны нисгэгч нарын нэг байсныг дахин тодотгон тэмдэглэх нь зүйтэй болов уу! Харамсалтай нь түүнийг 1937 оны 10 дугаар сарын 25-ны өдөр П.Гэндэн, Г.Дэмидийн хэрэгт холбогдуулан баривчилж, цаазлан хороожээ.
-
2017 оны 8 сарын 23
Хөвсгөл аймгийн Ренчинлхүмбэ суманд өчигдөр шөнө дундаас хойш орсон нойтон орж байгаа тухай бид мэдээлсэн.
-
2017 оны 8 сарын 23
2017 он гарсаар улсын хэмжээнд иргэдийн санамсар болгоомжгүй байдлаас шалтгаалан усны ослын золгүй тохиолдол 16 аймгийн 51 сум, нийслэлийн 4 дүүрэгт нийт 74 удаа гарчээ. Гол усны золгүй тохиолдлын улмаас 91 хүн амь насаа алдсан бол үүний 13 нь бага насны хүүхэд байгаа юм.
-
2017 оны 8 сарын 23
Хөвсгөл аймаг сүүлийн өдрүүдэд гэнэтийн хүчтэй усархаг аадар бороо, мөндөр орж хүн, мал эрсдэх тохиолдол гарсан байна.
-
2017 оны 8 сарын 23
Завхан аймаг энэ жил аймгийн хэмжээнд үр тариа 812 га, үүнээс 732 га-д улаан буудай, 80 га-д хөх тариа, тэжээлийн ургамал 697,5 га-д, төмс 236,8 га-д, хүнсний ногоо 117,0 га-д тус тус тариалжээ. Үүнээс 812 га-д үр тариа тариалснаас 100 га талбай ургац алджээ.Мөн 80 га талбай нь тэжээлд шилжсэн, малын тэжээл 697,5 га-д тариалснаас 51,4 га талбай ургац алдсан ба үлдсэн 649,1 га-гаас урьдчилсан төлөв байдлаар /ургац 13 цн/га/ нийт 837,9 тн тэжээл хураан авахаар байна. 2017 оны ургацын урьдчилсан балансаар үр тариа 632 тн үүнээс улаан буудай 632 тн / ургац 10 цн,га/, ногоон тэжээл 837.9 тн, төмс 2138.1 тн, хүнсний ногоо 1099 тн-ыг тус тус хураан авах урьдчилсан төлөв гарсан байна.
Түүнчлэн Асгат, Тэс суманд үр тариа тариалах чиглэлээр үйл ажиллагаа явуулж байгаа “Баяндарь” ХХК 900 га, “Шинэ тэс” ХХК 500 га нийт 1400 га-д уриншийн боловсруулалтыг хийх гэж байна. Өнөөдрийн байдлаар аймгийн хэмжээнд 12000 м2 талбай бүхий хоёр үтрэм, 5002 тн багтаамжтай 226 зоорь ашиглагддаг.
Тиймээс намрын ургац хураалт, хадланд ажиллах техникийн бэлэн байдлыг эртнээс сайтар хангах, засвар үйлчилгээг чанартай хийх, 2017 оны ургацын урьдчилсан балансыг таримлын төрлөөр гаргах, үтрэм, зоорь агуулахыг ургац хүлээн авахад бэлтгэж ариутгах арга хэмжээг ч мөн хийж байгаа ажээ. Дашрамд газар тариалангийн үйлдвэрлэл эрхэлдэг иргэдийн тоо 2017 онд 1376, аж ахуйн нэгжийн тоо 94 болж өнгөрсөн жилээс өссөн дүнтэй байгаа нь сайшаалтай хэмээн аймгийн ЗДТГ-аас мэдээллээ.
-
2017 оны 8 сарын 23
Е баримт сугалааны долдугаар сарын ээлжит тохирол өчигдөр явагдсан юм. Энэ удаагийн тохиролд 2017 оны долдугаар сарын 1-31-ний өдрийн хооронд худалдан авалт хийж, бүртгүүлсэн НӨАТ-ын баримт хамрагджээ.
Сугалаагаар 20 мянган төгрөгийн азтан 11 371, 100 мянган төгрөгийн азтан 1187, 500 мянган төгрөгийн азтан 96, дөрвөн сая төгрөгийн азтан 11 тодорсон бол 20 сая төгрөгийн азтан тодроогүй байна. Энэ удаагийн сугалааны тохирлоор нийт 12 665 хүн азтан болжээ.
Харин 400 сая төгрөгийн супер азтан тодроогүй байна.
-
2017 оны 8 сарын 23
Монгол Улсын Ерөнхий сайд Ж.Эрдэнэбат манай улсад айлчлал хийж буй ОХУ-ын Гадаад хэргийн орлогч сайд Игорь Владимирович Моргуловыг хүлээн авч уулзлаа.
Ерөнхий сайд, манай улсад энэ жил зуншлага тааруу, ихэнх нутагт гантай байгаагаас ургац алдах эрсдэлтэй байна. Иймд ОХУ-аас өвс, тэжээл худалдан авахаар ярилцаж тохирч байгаа. Мөн боловсруулсан мах болон үржлийн мал экспортлох талаар ярилцаж байна. Эдгээр шийдвэрийг болон Петербургийн олон улсын эдийн засгийн чуулга уулзалтын зарим тохироог Владивосток хотноо ирэх есдүгээр сард болох Дорнын эдийн засгийн чуулга уулзалтын үеэр эцэслэж, бодит ажил хэрэг болгох бэлтгэлийг Засгийн газрын түвшинд хангалаа. Энэ ажилд дэмжлэг үзүүлж ажиллаж байгаа ОХУ-ын Гадаад хэргийн яаманд талархал илэрхийлье гэлээ.
Монгол, Оросын харилцааны чухал хэсэг бол бүс нутаг, хил орчмын хамтын ажиллагаа юм. Хоёр улсын нийт худалдааны 70 хувийг бүс нутаг хоорондын худалдаа эзэлдэг. Иймээс хил орчмын яармаг худалдааг зохион байгуулахад хоёр талын төр, засгаас дэмжлэг үзүүлэх нь чухал гэдгийг ч Ерөнхий сайд тэмдэглэж байлаа.
Хоёр орны худалдааны эргэлт сүүлийн хоёр жил дараалан буурч байсан ч энэ оны эхний хагас жилд худалдаа эргэлт өсөж байгаа гэдгийг орлогч сайд дурдаад Монгол Улс, Евразийн Эдийн засгийн холбоо хооронд Чөлөөт худалдааны хэлэлцээр байгуулах боломжийг судлах ажлын хэсгийг байгуулах асуудалд анхаарч ажиллахаа илэрхийллээ.
Мөн Монгол Улсын Ерөнхий сайдын ОХУ-д хийх айлчлалыг энэ ондоо багтааж хэрэгжүүлэхээр ажиллаж байгааг оросын тал тэмдэглэв гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 8 сарын 23
2017 оны наймдугаар сарын 23-ны Лхагва гарагт хийх засварын хуваарийг танилцуулж байна. Хэрэглэгчид ээ, засвар хийх хугацаанд хэрэглээгээ түр зохицуулна уу.
СҮХБААТАР ДҮҮРЭГ
22:00-09:00 цагт: 7, 13, 14, 17-р хороо Яргайт, Хандгайт, Хайлааст, Дамбадаржаа, Сэлх орчмоор, 7-р хороолол, 102-р сургууль орчмоор,
ЧИНГЭЛТЭЙ ДҮҮРЭГ
10:00-16:00 цагт: 15, 16-р хороо Согоотын 5, 6, 9, 26, Жаргалантын 23, 24-р гудамж
22:00-09:00 цагт: 7, 10, 12, 15, 18-р хороо Чингэлтэй, Булаг, Дэнж, Яргайт, Жаргалант, Согоот, Хувьсгалчдын гудамж, 3, 5, 6, 9, 13, 15-р хороо Хайлааст, Нуур, Дэнжийн мянга, 6-р хороолол, Хүрд компани орчмоор
БАЯНГОЛ ДҮҮРЭГ
09:30-17:00 цагт: 10, 22-р хороо Зүүн Нарангийн 14, 15, 16, 17-р гудамж
22:00-09:00 цагт: 11, 12-р хороо Хувьсгалчид, Баруун, Зүүн, Дунд Тасганы гудамжууд, Тасганы усан сан, 6-р бичил хороолол, МҮОНРТ орчмоор
СОНГИНОХАЙРХАН ДҮҮРЭГ
09:30-17:00 цагт: 12, 13-р хороо 1-р хороолол 1, 2, 8, 11-р байр, 24-р хороо Баруун салаа орчмоор
22:00-09:00 цагт: 1, 22, 24-р хороо Баянголын ам, Зээлийн гудамж.
Цахилгаан эрчим хүчээр түр хязгаарлагдах хэрэглэгчдийг байршлаар нь баримжаалан жагсааж байгааг анхаарна уу. Цаг агаарын болон болзошгүй аваар саатлаас шалтгаалан хуваарьт өөрчлөлт орох магадлалтай ба өөрчлөгдсөн тохиолдолд УБЦТС ТӨХК-тай байгуулсан гэрээнд бүртгэлтэй утсаар холбогдож ААН, үйлдвэр, компаниудад мэдээлэх болно.
Цахим үйлчилгээ: http://my.tog.mn
Мэдээлэл, лавлагаа авах утас: 70047004
-
2017 оны 8 сарын 23
Аргын тооллын 8 сарын 23, Буд гараг. Билгийн тооллын 2, Бага морь одтой, хар морь өдөр. Өдрийн наран 6 цаг 02 минутад мандан, 19 цаг 49 минутад жаргана. Тухайн өдөр бар, нохой жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр элдэв үйлд хянуур хандах хэрэгтэй ба ан, гөрөө хийх, мал, адгуус муулах, угаал үйлдэх, тангараг тавих, гэр, байшингийн суурь тавихад сайн. Гэр бүрэх, хэрүүл тэмцэл хийхэд муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод хойш мөрөө гаргавал зохистой. Халуун эгэх улирал 7 цаг 24 минутад эхэлнэ. Үс шинээр үргээлгэх буюу засуулахад тохиромжгүй.
-
2017 оны 8 сарын 23
2017 оны 08 дугаар сарын 22-ны 20 цагаас 08 дугаар сарын 23-ны 20 цаг
хүртэлх цаг агаарын урьдчилсан мэдээ:
БАРУУН АЙМГУУДЫН НУТГААР: Солигдмол үүлтэй. Шөнөдөө нутгийн зүүн хэсгээр бороо, уулаараа хур тунадас орно. Өдөртөө бороо орохгүй. Салхи баруун хойноос секундэд 6-11 метр. Алтай, Хангайн уулархаг нутгаар шөнөдөө 2 хэм хүйтнээс 3 хэм дулаан, өдөртөө 10-15 хэм, Эхийн голын Баянбүрд орчмоор шөнөдөө 13-18 хэм, өдөртөө 22-27 хэм, бусад нутгаар шөнөдөө 1-6 хэм, өдөртөө 15-20 хэм дулаан байна.
ТӨВИЙН АЙМГУУДЫН НУТГААР: Үүлэрхэг. Ихэнх нутгаар бороо, уулаараа хур тунадас орно. Салхи баруун хойноос секундэд 5-10 метр, зарим газраар газраар секундэд 12-14 метр хүрч ширүүснэ. Хангай, Хөвсгөл, Хэнтэйн уулархаг нутгаар шөнөдөө 3 хэм хүйтнээс 2 хэм дулаан, цочир хүйтэрнэ, өдөртөө 7-12 хэм, бусад нутгаар шөнөдөө 3-8 хэм, өдөртөө 12-17 хэм дулаан байна.
ЗҮҮН АЙМГУУДЫН НУТГААР: Үүлэрхэг. Ихэнх нутгаар бороо орно. Дуу цахилгаантай. Салхи баруун хойноос секундэд 5-10 метр, зарим газраар секундэд 12-14 метр хүрч ширүүснэ. Сэрүүсч нутгийн хойд хэсгээр шөнөдөө 3-8 хэм, өдөртөө 11-16 хэм, бусад нутгаар шөнөдөө 8-13 хэм, өдөртөө 16-21 хэм дулаан байна.
ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Бороо орно. Дуу цахилгаантай. Салхи баруун хойноос секундэд 7-12 метр. Шөнөдөө 8-10 хэм, өдөртөө 16-18 хэм дулаан байна.
ГОВИЙН АЙМГУУДЫН НУТГААР: Үүлшинэ. Нутгийн хойд хэсгээр бороо орно. Дуу цахилгаантай. Салхи баруун хойноос секундэд 5-10 метр, зарим газраар түр зуур секундэд 14-16 метр хүрч ширүүснэ. Сэрүүсч Дундговийн нутгаар шөнөдөө 6-11 хэм, өдөртөө 15-20 хэм, бусад нутгаар шөнөдөө 10-15 хэм, өдөртөө 21-26 хэм дулаан байна.
УЛААНБААТАР ХОТ: Үүлэрхэг. Бороо орно. Салхи баруун хойноос секундэд 6-11 метр. Шөнөдөө 6-8 хэм, өдөртөө 12-14 хэм дулаан байна.
2017 оны 08 дугаар сарын 24-нөөс 08 дугаар сарын 28-ныг хүртэлх
цаг агаарын урьдчилсан төлөв:
24-27-нд төв болон зүүн аймгуудын нутгийн хойд хэсгээр түр зуурын бороо орно. Дуу цахилгаантай. Салхи 24, 27-нд нутгийн зүүн хэсгээр секундэд 14-16 метр хүрч ширүүснэ. Хугацааны эхэн болон сүүлчээр сэрүүсч Хангай, Хөвсгөл, Хэнтэйн уулархаг нутгаар шөнөдөө 2 хэм хүйтнээс 3 хэм дулаан, цочир хүйтэрнэ, өдөртөө 8-13 хэм, говийн бүс нутгийн өмнөд хэсгээр шөнөдөө 9-14 хэм, өдөртөө 21-26 хэм, бусад нутгаар шөнөдөө 3-8 хэм, өдөртөө 13-18 хэм дулаан байна. 25-26-нд өдөртөө дулаарна.
-
2017 оны 8 сарын 22
Хөвсгөл аймгийн Ренчинлхүмбэ суманд өчигдөр шөнө дундаас хойш орсон нойтон оржээ. Цас үргэлжлэн орж байгаа тухай нутгийнхан мэдээлж байна.
-
2017 оны 8 сарын 22
”Эрдэнэс Тавантолгой” ХК-ийн В ээлжийн оператор Л.Ариунсан хууль бусаар ажлаас халагдсанаас болж, өлсгөлөн зарласан билээ. Тэрбээр дөрвөн өдөр өлсгөлөн зарласан ч өвчний улмаас өлсгөлөнгөө үргэлжлүүлэх боломжгүй болсон.
-
2017 оны 8 сарын 22
БСШУС-ын сайд төрийн өмчит бүх их, дээд сургуулийн сургалтын төлбөрийг нэмэхгүй байх үүрэг, чиглэлийг удирдлагуудад нь өгсөн. Гэвч МУИС-ийн нэг багц цагийн төлбөр өмнөх жилийнхээс нэмэгджээ.
