Улаанбаатар
Өнөөдөр / 2017.09.19
21
Өдөртөө
4
Шөнөдөө

Б.Хонгорзул олимпийн өлгий нутгаас хүрэл медаль хүртлээ

2017 оны 9 сарын 10

Чөлөөт бөхийн 2017 оны өсвөр үеийн Дэлхийн аварга шалгаруулах тэмцээн Грекийн нийслэл Афинд үргэлжилж байна. Афин хотын “Ano Liosia Olympic Hall” ордонд (Энэхүү ордонд "Афин-2004" олимпийн наадмын чөлөөт бөхийн тэмцээн зохион байгуулагдсан) болж буй хөвгүүдийн 23, охидын 11 дэх удаагийн тэмцээний гурав дахь өдөр буюу өнөөдөр охидын 52 кг-ын жинд “Бангкок-2017” өсвөр үеийн Азийн АШТ-ий мөнгөн медальт, өсвөр үеийн УАШТ-ий 2015, 2016, 2017 оны аварга, 2014 оны мөнгөн медальт, “Азийн хүүхдүүд” олон улсын хүүхдийн спортын VI наадам, “Асашёорюү кап” ОУТ, “Монгол туургатан” олон улсын хүүхдийн спортын наадмын аварга, Баянхонгор аймгийн тамирчин Болдсайханы Хонгорзул хүрэл медалийн эзэн боллоо. Тэрбээр Монголын чөлөөт бөхийн тамирчдаас өсвөр үеийн ДАШТ-ээс 13 дахь медалийг эх орондоо авчирч байна. Энэ жинд одоогоос зургаан жилийн өмнө Унгарын Сомбатхейд болсон тэмцээнээс ОУХМ Алтанцэцэгийн Батцэцэг мөнгөн медаль хүртэж байв.

 


Б.Хонгорзулын жинд 22 орны тамирчин барилдсан бөгөөд эхлээд Украины Соломиа Винникийг, дараа нь Канадын Виктория Салыг тус бүр оноогоор цэвэр (10:0) ялсан ч 1/4 шигшээд 2016 оны өсвөр үеийн Азийн аварга Японы Юзүка Инагакид 2:12-оор ялагдав. Түүний өрсөлдөгч нь шигшээд шалгарснаар дагаж барилдахаар болсон. Дагах барилдаанд Польшийн Польшийн Аманда Томшикийг 7:0-ээр, медальтай үлдэх эсэхээ шийдвэрлэх барилдаанд өнгөрсөн жилийн ЕАШТ-ий хүрэл медальт ОХУ-ын Анастасья Сиделниковаг 6:1-ээр тус тус ялсан юм.

 


Өсвөр үеийн ДАШТ-ээс нэг хүрэл медальтай ирж байгаа хэдий ч манай охидуудад Афины цагийн зөрүү нөлөөлөв үү, санасныг бодвол боломжоосоо доогуур барилдлаа. Монголын эмэгтэй бөхчүүдийн ирээдүйд авч явах залгамж халаа болсон охидууд маань олимпийн өлгий нутгийн дэвжээ том туршлага болсон нь дамжиггүй. Тэднийг цаашид олон тэмцээн хүлээж байна. 

 

 


Охидын 10 жингийн долоод нь Японы охид түрүүлэв. Наран улсын 56, 60 кг-д зодоглосон тамирчдыг энэтхэг охид шигшээ барилдаанд ялж аваргалжээ. Хэдэн жилийн өмнө Энэтхэгийн эмэгтэй бөхчүүд Ази тивд тийм ч хүчтэй өрсөлдөгч биш байлаа. Тэгвэл цаг өөр болж, тэрбум гаруй хүн амтай Жагарын орны нядханууд өсвөр үе, залуучууд, насанд хүрэгчдийн ангилалд дэлхийд айлгах хэмжээний өрсөлдөгч болжээ. Өсвөр үеийн ДАШТ-ий охидын хамгийн хөнгөн жинд Азербайжаны Шахана Назарова түрүүлж, Европ тивийн цорын ганц алтан медалийг зүүсэн юм.

 

ОХИДЫН ТЭМЦЭЭНИЙ ДҮН:


38 кг (12 тамирчин): 1. Шахана Назарова (Азербайжан) 2. Мария Томыщ (Украин) 3. Лучана Бекбаулова (ОХУ), Жульета Эсперанца Мартинез Гонсалез (Мексик) ...8. Энхболдын Буман-Аюуш (Монгол)
40 кг (11): 1. Ханано Сакүраи (Япон) 2. Петия Дэлчева (Болгар) 3. Симран Симран (Энэтхэг), Эйшан Юсифова (Азербайжан)
43 кг (16): 1. Юми Ито (Япон) 2. Эмили Кинг Шилсон (АНУ) 3. Неелам Неелам (Энэтхэг), Алдынай Даржаа (ОХУ) ...11. Батбаатарын Энхзул (Монгол)
46 кг (20): 1. Ремина Йошимото (Япон) 2. Екатерина Михайлова (ОХУ) 3. Луси Йепес Гузман (Эквадор), Маниша (Энэтхэг) ...13. Түмэнбаярын Цээням (Монгол)
49 кг (19): 1. Сүзүна Йошимүра (Япон) 2. Мария Тюмерекова (ОХУ) 3.Татьяна Профатилова (Украин), Зейнеи Йетгил (Турк) ...17. Дагвадоржийн Отгонжаргал (Монгол) 
52 кг (22): 1. Юзүка Инагаки (Япон) 2. Андреа Ана (Румын) 3. Болдсайханы Хонгорзул (Монгол), Минакши (Энэтхэг)
56 кг (23): 1. Сонам Сонам (Энэтхэг) 2. Сена Нагамото (Япон) 3. Анастасия Блайвас (Герман), Анна Хелла Сжел (Унгар) ...10. Өлзийсайханы Пүрэвсүрэн (Монгол)
60 кг (23): 1. Аншу Аншу (Энэтхэг) 2. Наоми Рүике (Япон) 3. Эрика Богнар (Унгар), Кристина Сазыкина (Беларусь) ...12. Нандинцэцэгийн Анударь (Монгол)
65 кг (23): 1. Хонока Накаи (Япон) 2.Алара Леа Бойд (АНУ) 3. Оксана Чудык (Украин), Виктория Алеся Зехцяренко (Беларусь) ...14. Дэлгэрцогтын Түмэнхүслэн (Монгол) 
70 кг (17): 1. Юка Кагами (Япон) 2. Алёна Тимофеева (ОХУ) 3. Келани Сара Корбетт (АНУ), Бернадетт Наги (Унгар) ...10. Цэрмаагийн Хулан (Монгол)

Та мэдээнд саналаа өгсөн байна
  • 0
  • 0
  • 0
  • 0
  • 0
  • 0
  • 0
Манай сайт танд таалагдаж байвал LIKE хийгээрэй. Танд баярлалаа.
Зарын булан