Английн бяцхан иргэн Ира Ландорн охиныг төрсний дараа бие нь хөхөрч няцарсан гэж андуурсан тухай эцэг, эх нь ярив.

    Английн бяцхан иргэн Ира Ландорн охиныг төрсний дараа бие нь хөхөрч няцарсан гэж андуурсан тухай эцэг, эх нь ярив. “Линкольншир” хүүхдийн эрүүл мэндийн төвийн нийгмийн ажилтан Ханна Лангхорн охины нэрийг мэдээллийн санд бүртгэж оруулна гэдгээ мэдэгджээ. Учир нь хөх толботой хүүхэд төрөх нь түүхэнд тэмдэглэх үйл явдал мөн гэж тэрээр үзэж байна. “Бид эмч, эрүүл мэндийн ажилтнуудад хандсан боловч толбыг арилгах боломжгүй гэж хэлсэн” хэмээн охины ээж ярив.
Энэ талаар Хүүхдийн эрүүл мэндийн төвийн туслах захирал Женис Спенсер тодорхой хариулт өгчээ. “Хүүхдийн эрүүл мэндэд онцгой анхаарах нь бидний үүрэг. Гэхдээ энэ толбо ямар ч аюулгүй. Бид Монголын хөх толбоны учир шалтгааныг анагаах ухааны онолын үндсэн дээр тайрбарлахыг хичээж байна” гэж тэрээр ярьсан байна. Мөн хүүхдийн сувилахуйн багш Жереми Жолли “Монгол толбыг хүмүүс хөх няц гэж андуурдаг. Энэ толбо хүүхдийг дөрвөн нас хүрэхэд аяндаа арилдаг, ямар ч аюулгүй тул эмчлэх шаардлагагүй” гэв.

    Цэнхэр өнгө нь арьсан дахь будагч эсүүдээс шалтгаалж үүсдэг. Барууны орнуудад хүүхэд төрөхөд хөх толбо байвал төрсний гэрчилгээн дээр нь заавал тэмдэглүүлдэг байна.
Хөх толбо нь ихэнхдээ Монголчууд, Түрэгүүд болон Хятад (тус улсын хүн амын монгол угсаатнуудын дунд), Япон болон Солонгос улсад тохиолдох бөгөөд эцэг эхийн аль нэг нь хөх толботой үед 90-95%-д нь, харин зүүн Африк болон индианчуудын 80-90%-д нь тус тус тохиолддог байна. Мөн Энэтхэгийн ойролцоох газар нутгийн, Энэтхэг, Пакистан, Афганистан, Бангладеш зэрэг улс оронд бас тохиолддог.
Европоос гаралтай цагаан арьстнуудын дунд 1-10% тохиолддогийг төв Азийн нүүдэлчдийн байлдан дагуулалттай холбон авч үздэг.
    Хөх толбыг Монголчууд тэнгэрийн тамга гэж бэлгэшээдэг. Монголчууд өөрсдийгөө хөх толбот Монголчууд гэдэг. Харин нийтлэлч Баабар үүнийг Алтайн угсааныхны генетикийн нийтлэг шинж юм гэж тайлбарласан байдаг.