Амин хувиа хичээсэн иргэд, аж ахуйн нэгжээс болж нийтийн эрх зөрчигдөж, бүр иргэд амь насаа алдах тохиолдол цөөнгүй гарч байна. Үүнийг нь ч Онцгой байдлын болон түргэн тусламжийн алба хаагчид цаг үргэлж хэлж, ярьсаар байгаа боловч дорвитой шийдэлд хүрч чадалгүй өнөөг хүрэв. Нэгэн харамсалтай хэргээр жишээ татахад, гэр хороололд гарсан гал түймрийг унтраахаар очсон галынхан гудамж руу орох орц, гарцыг хааж барьсан айлаас болж багагүй цаг алдсан байдаг.

Үүний улмаас нэгэн гэр бүлийн бүх гишүүд гэртээгээ шатаж, амиа алдсан харамсалтай хэрэг саяхан гарсан юм. 

Энэ мэт харамсалтай хэргийг тоочоод байвал барагдахгүй. Тэгвэл өнөөдөр 15.00 цагийн орчимд 1000 гаруй иргэн амь нас, эрүүл мэндээрээ хохирох шахсан хэрэг гарлаа. Тодруулбал, өнөөдөр 15.00 цагийн орчимд Сүхбаатар дүүргийн нэгдүгээр хорооны нутаг дэвсгэрт байрлах “MPМ” цогцолборт нэмэлтээр сууриллуулж байсан лифт шатсан юм. Онцгой байдлын гал унтраах ангийн алба хаагчид гал түймрийг унтраахаар дуудлага хүлээн авсан даруйдаа хөдөлсөн байдаг. Гэвч автозамын түгжрэл дээр нь ослын газар руу нэвтрэх хамгийн боломжтой хэсэг болох нийтийн эзэмшлийн талбайг “UMD” компани хаасны улмаас нарийн замаар очихоос аргагүй болжээ. Арай хийж ослын цэгт очиж, гал түймрийг унтраасан боловч галын тархалт их талбайг хамарсан байсан гэдгийг онцгой байдлын болон цагдаагийн алба хаагчид энэ үеэр хэлсэн юм.

Иргэдийн хэлснээр “UMD” компани нь нийтийн эзэмшлийн зам талбайг хааж, блокон хашаа бариагүй байсан бол галынхан ингэж цаг алдахгүй байсан гэдгийг хэлсэн юм.

Гал түймрийн үеэр иргэд осолдож, гэмтээгүй ч гэлээ хэзээ, хэдийд ямар осол гарахыг хэн ч таашгүй. Тиймээс хотын удирдлагууд энэ мэт үйлдлийг анхааралдаа авч, нийтийн эзэмшлийн талбайг өөрийн мэдэлдээ авсан эрх мэдэлтнүүдтэй хариуцлага тооцохгүй бол иргэдийн амь нас, эрүүл мэнд дээсэн дөрөөн дээр дэнжигнэх аюул хажууханд байна шүү гэдгийг цохон тэмдэглэе.

Энэ хэсгийг хаагаагүй байсан бол галын машин цаг алдалгүй шууд нэвтрэх бүрэн боломжтой байжээ

Ингээд энэ талаар “Нар-Урт” компанийн барилгын инженер Ц.Цэнд-Аюушаас тодрууллаа.

Ц.ЦЭНД-АЮУШ: ОРЦ, ГАРЦ ХААСНААС БОЛЖ ГАЛЫНХАН ЦАГ АЛДСАН

-Хэдэн цагийн үед гал түймэр гарсан юм бэ?

-15.00 цагийн орчимд гал гарсан. Галын дохиолол дуугарахтай зэрэгцээд 1000 гаруй иргэн барилгаас маш хурдан гарсан.

-Гэмтэж, бэртсэн хүн бий юү?

-Байхгүй.

-Гал унтраахаар ирсэн галын машин ослын цэг рүү очиж чадахгүй цаг алдсан гэсэн. Энэ юунаас болсон юм бэ?

-Хоёр зүйлээс болсон. Нэг нь гал гарсан барилгын хажууханд галын усны худаг байдаг. Гэтэл энэ худаг руу галын худаг дөхөж чадаагүй. Хоёрдугаарт, орц, гарц хаалттай байдлаас болж галын машин цаг алдах шалтгаан болсон.

-Өмнө нь орц, гарцтай холбоотой асуудал үүсэж байсан. Энэ зам  юм уу?

-Тийм. Уг нь манай байгууллагын зүгээс түргэний тэрэг, галын машин энэ хэсгээр зорчих ёстой. Үүний тулд орц, гарцыг чөлөөлөх шаардлагатай байна гэж холбогдох байгууллагад нь олон удаа хандсан. Гэвч нийтийн эзэмшлийн зам талбайг нэг албан байгууллага өнөөдрийг хүртэл хаачихаад байна. Үүнээс болж 1000 гаруй иргэн амь нас, эрүүл мэндээрээ хохирох шахлаа. Хэрвээ энэ орц, гарц нээлттэй байсан бол гал түймрийг богино хугацаанд унтраах боломж бүрэн байсан. Өөрөөр хэлбэл, гал их хэмжээгээр тархахаас өмнө шүү дээ.

-Энэ хэсгийг хаасан талбай нийтийн эзэмшлийн талбай юм билээ. Гэтэл ямар компани хаасан юм бэ?

-“UMD” компани хаасан. Энэ компани нийтийн эзэмшлийн талбайг авто зогсоолын чиглэлээр ашигладаг. Уг нь чөлөөлөөд өгчихвөл энэ хэсэгт автозам барихаар зураг төсөл нь батлагдсан. Автозамыг хэзээ л бол хэзээ барихад бэлэн юм билээ. Гэтэл энэ компанийнхан чөлөөлж өгөхгүй гэж эсэргүүцдэг.

-Гал гарах үед галын машин хаагуур орж, гал унтраасан юм бэ?

-“Marque” төвийн хажуугаар орсон. Энэ зам нь их нарийнхан. Үүний улмаас галын машинууд эргэлт хийх гэж цаг их авсан. Уг нь түрүүний хэлсэнчлэн орц, гарц нээлттэй байсан бол цаг алдалгүй шууд орох боломжтой байсан.

-Хэдий хэр хугацаанд гал түймрийг бүрэн унтраасан юм бол?

-30-40 орчим минут болсон байх.

Г.Эрдэнэ

Нийтийн эзэмшлийн талбайг зөвшөөрөлгүй хааж, хувийн хэрэгцээнд ашиглаж буй байдал