УИХ-ын гишүүн Ж.Батзандан тэргүүтэй ШИНЭ намын төлөөлөл мэдээлэл хийж, Үндсэн хуулийн нэмэлт, өөрчлөлтийг УИХ-ын гуравдугаар хэлэлцүүлгийн хүрээнд хийж дуусгах хэрэгтэй гэсэн байр суурьд санал нэгдэхгүй гэдгээ илэрхийлэв.

Энэ талаар гишүүн Ж.Батзандан “С.Зориг агсны амь насыг хөнөөсөн хэрэгтэй холбогдуулж, уг хэргийг илрүүлэхэд иргэдийг эрүүдэн шүүсэн асуудлаар Түр хороо байгуулсан. Олон Улсын Парламентын холбооны Хүний эрхийн төлөөлөгчид хамтран ажиллаж байгааг мэдэж байгаа. Өнгөрсөн зургадугаар сард Олон Улсын парламентын холбооны Хүний эрхийн төлөөлөгчид хүрэлцэн ирж эрүү шүүлт, яргалалд орж, хилсээр хэрэг хүлээсэн гэх Монгол Улсын иргэн Б.Содномдаржаа, Т.Чимгээ нартай уулзсан. Түүнчлэн уг хэргийн мөрдөн шалгасан хууль хяналтын байгууллагын удирдлагууд холбогдогч этгээдүүдтэй уулзаж, албан ёсны дүгнэлтээ бидэнд өнгөрсөн долоо хоногт ирүүлсэн. Үүнд, Олон Улсын Парламентын холбооны хуульч, шинжээчдийг багийг оролцуулсан  30 орчим хуудас бүхий нарийвчилсан дүгнэлт байна. Дүгнэлтийн ирэх лхагва гарагт Түр хороо хэлэлцэж, иргэдэд ил тод танилцуулна.

Дүгнэлттэй холбоотой зарим зүйлийг танилцуулъя. Тухайлбал, Олон Улсын Парламентын холбооноос Б.Содномдаржаа, Т.Чимгээ нарыг эрүүдэн шүүсэн үйлдэл нь мөрдөн байцаагч, прокурор, тагнуулын ажилтнуудын хууль бус үйл ажиллагаа болохыг нотолсон байна. Эрүүдэн шүүсэн хэргийг шүүсний дараа тэднийг суллах тухай хууль хяналтын байгууллагынхан ярьж эхэлснийг мөн буруушаасан байна. Мөрдөн шалгах ажиллагааны явцад нотлох баримтыг хууль бусаар олж авсан нь тогтоогдчихоод байхад эрүүдэн шүүсэн хэргийг шүүсэн шүүхийн шийдвэр гарсны дараа суллана гэх зүйлийг эрх бүхий албан тушаалтнууд ярьж байгаа нь хууль бус үйлдэл гэж үзжээ. Ц.Амгаланбаатар нартай уулзсан уулзалтын тэмдэглэлийг баримтад хавсаргажээ. Ц.Амгаланбаатарын зарим тэмдэглэлээс уншиж танилцуулъя. Энэ нь улсын нууц биш гэдгийг анхааруулъя.

Тухайлбал, 2012 оноос эхлэн Ц.Амгаланбаатарын өрөөнд тагнуулын ажилтнуудыг хамтад нь оруулж, түүнийг өдөр бүр дарамталж, Б.Содномдаржаа нарын тухай худал мэдээллийг өгөхийг шаарддаг байсан тухай Олон Улсын парламентын холбооны төлөөлөгчдөд хэлсэн байна. Ц.Амгаланбаатар ээжтэйгээ уулзахыг их хүсдэг байсан. Тагнуулын алба хаагчид Б.Содномдаржаа нарыг гүтгэчих. Тэгвэл ээжтэй чинь уулзуулна гэж хэлдэг байжээ. Ц.Амгаланбаатар өөрийгөө маш ноцтой авлигын тогтолцооны хохирогч болсон гэж төлөөлөгчдөд хэлсэн байна. С.Зоригийг хөнөөсөн хэргийг хүлээвэл ээжтэй чинь уулзуулна, мөнгө өгнө гэж амлажээ. Мөн тэрбээр өгсөн мэдүүлгээсээ буцахад прокурор болон тагнуулын удирдлагуудаас “Хэрэв чи мэдүүлгээсээ буцвал чиний гэр бүл, ах дүү нарт чинь ноцтой аюул учирч магадгүй шүү” гэж сүрдүүлсэн тухай Түр хороон гишүүдэд хэлж байснаа нотолж ярьжээ. Б.Содномдаржаа, Т.Чимгээ нарт би хэзээ ч мессеж явуулж байгаагүй. Харин миний өмнөөс тагнуулынхан мессеж явуулж байсныг 2014 онд мэдсэн.

2013 оны долдугаар сард тагнуулын ажилтан н.Мөнхбат гэдэг хүн Ц.Амгаланбаатартай удаа дараа уулзаж, С.Зоригийн амь насыг хөнөөсөн хэрэгт холбогдоод байгаа хүмүүсийн талаар мэдүүлэг өгөхийг шаардаж байжээ. Олон Улсын парламентын холбооноос ирсэн дүгнэлтийг нэг бүрчлэн танилцуулах болно” гэлээ.

Б.Лхам