“Энержи ресурс” компанийн гүйцэтгэх захирал Г.Батцэнгэл цаг үеийн асуудлаар мэдээлэл хийлээ.

Тэрбээр “УИХ-ын 2018 оны нэгдүгээр сарын 5-ны өдрийн тогтоолоор шахмал түлш үйлдвэрлэхийг үүрэг болгосон юм билээ. Энэ дагуу 2018 оны нэгдүгээр сард Ажлын хэсгийн төлөөлөл Ухаахудагийн уурхайд ирсэн. Тэгэхдээ манай баяжуулах үйлдвэрээс гаргаж байгаа нүүрсээ бидэнд нийлүүлэх талаас нь бодоочээ. Улаанбаатарын утааг бууруулах, иргэдийн эрүүл мэндийг бодож, нийгмийн хариуцлагаа хэрэгжүүлээч гэсэн. Эрчим хүчний яамнаас дээжээ өгөөч гэсэн. Тэр дагуу нийлүүлсэн. Дөрөвдүгээр сард нь Ерөнхий сайдын ахлах зөвлөхийн албан тоот ирсэн. Жилдээ 800 мянган тн нүүрсийг шахмал үйлдвэрлэх зорилгоор үнэ төлбөргүй нийлүүлээч гэсэн. Бид болгоомжтой хандсан. Улсаа, нийгмээ, ард иргэдээ бодож ажил хийхээр харлуулдаг, цагдаа, шүүхээр дарамталдаг, заваан улс төрдөө татан оруулах гэж үздэг. Үүнийг бүгдээрээ сайн мэдэж байгаа. Үүний хүрээнд хэлсэн юм. Ачих зардлыг нь бид өөрсдөө хариуцна.

Тээвэрлэлтээ компани нь өөрөө хариуцаарай гэсэн. 2018 оны тавдугаар сард Эрчим хүчний яамнаас “Тавантолгой түлш” компанитай гэрээ байгуулаарай. Нүүрсээ нийлүүрэй. “Эрдэнэс Монгол”-ын охин компани хэлбэрээр үйл ажиллагаа явуулна гэсэн албан тоот ирсэн. Долдугаар сард нь М.Ганбаатар захирал ирж уулзсан. Наймдугаар сард нь гэрээ байгуулсан. Энэ гэрээ нь Улаанбаатар хотын агаарын бохирдлыг бууруулах зорилгоор баяжуулсан нүүрс нийлүүлэхээр болсон. Хаширсан хүн гэж хаширсан хүнийг хэлдэг. Тиймээс Авлигатай тэмцэх газар, Сангийн яам, Төрийн өмчийн хороо, Хууль зүйн яамнаас тодруулга аваад гэрээг байгуулж болно гэдэг баталгаагаа гаргаж өгөөрэй гэсэн. Тэр бүх бичиг нь гэрээний салшгүй хэсэг болоод явж байгаа.

Ерөнхий сайдын гарын үсэгтэй Ажлын хэсэг байгуулах захирамж, Эрчим хүчний яамнаас ирүүлсэн хүсэлт нь байна. Ерөнхий сайдын ахлах зөвлөх Б.Энх-Амгалан гэдэг хүнээс албан тоот ирсэн. Нийт 800 мянган тн нүүрсийг үнэ төлбөргүй нийлүүлж, бидний ажлыг дэмжээч гэсэн. Агаарын бохирдлыг бууруулах асуудалд үнэхээр хувь нэмэр болно гэж үзсэн. Бидний хувьд арагшаа суух хэцүү байсан. Экспорт хийж орлого олдог компани. Хойшоо суувал суух л байсан. Гэхдээ хүсэлтийг нь хүлээн авч эрчим хүчний нүүрс нийлүүлсэн. Зарим хүн хог хаягдал нийлүүлсэн гэсэн байна лээ. Гаалийн лабораторид шинжлүүлсэн. 6300 ккал/кг илчлэгтэй хог байдаг бол надад харуул. Мэргэжлийн хүний үгийг сонсох хэрэгтэй шүү. Зөвхөн төрийн биш олон улсын чанарын шаардлага хангасан бүтээгдэхүүнийг нийлүүлсэн. 6000-аас дээш ккал/кг-тай хог гэж байдаггүй юм аа.

“Энержи ресурс” компани нийгмийн хариуцлагын хүрээнд агаарын бохирдлыг бууруулах ажилд хамтарч оролцсон. Өмнөх туршлага ч бий. Гэвч ингэж шоглуулж, хардуулж, гүтгүүлж байгаад үнэхээр харамсч байна. Үнэн зөв мэдээлэл өгөхийн тулд энэ мэдээллийг түгээж өгөөсэй гэж хүсэж байна.

Бидний хувьд шаардлагатай бол таван жил хүртэлх хугацаанд нийлүүлье гэдгээ хэлсэн" гэлээ.

С.Сүлд