Эрүүгийн хууль, Шүүхийн шийдвэр гүйцэтгэх тухай хууль, Зөрчлийн тухай хууль, Зөрчил шалган шийдвэрлэх тухай хуульд нэмэлт, өөрчлөлт оруулахаар ажлын хэсгийнхэн хуралдаж байна.
Дээрх хуулиудын нэмэлт, өөрчлөлтөөр зарим төрлийн гэмт хэрэгт оногдуулах ялын бодлогыг чангаруулахаар болжээ. Тухайлбал, хар тамхи, мансууруулах төрлийн бодис хэрэглэсэн, худалдсан, хадгалсан, тээвэрлэсэн, бэлтгэхдээ зохион байгуулалттайгаар үйлдсэн нь нотлогдвол 12-20 жил эсхүл бүх насаар нь хорих ял оногдуулахаар төлөвлөжээ. Ялын бодлогыг ийн чангаруулсан хуулийн төслийг УИХ-ын чуулганаар батлуулахаар УИХ-ын гишүүд хэдийнэ тохиролцсон байна. Хэрвээ хуулийн энэ заалтыг батлуулж чадвал МАН иргэдийн талархалыг хүртэх нь лавтай. Учир нь хар тамхи, мансууруулах төрлийн бодисны хэрэглээ жил ирэх тусам нэмэгдэж, дагаад гэмт хэрэг үйлдэгдэх нь олширсон.
Мөн энэ төрлийн бодисыг улсын хилээр хууль бусаар нэвтрүүлэх гэсэн үйлдэл ч гэсэн жил ирэх тусам нэмэгдсэн. Түүнчлэн мансууруулах төрлийн ургамал манай улсын нутаг дэвсгэрт их хэмжээгээр ургадаг зэрэг нь энэ төрлийн гэмт хэрэг үйлдэгдэх, хэрэглээ өсөхөд нөлөөлж буй. Дээрх хүчин зүйл нь ялын бодлогыг ийн чангаруулах шийдэлд хүргэхээр аргагүй байдалд хүргэсэн бололтой. Дээрх хуулиудад нэмэлт өөрчлөлт оруулах ажлын хэсгийнхэн хуулийн төслөө ирэх долоо хоногт байнгын хороодод танилцуулахаар төлөвлөсөн. Хэрвээ байнгын хорооны хуралдаанаар дэмжигдвэл УИХ-ын чуулганаар хэлэлцэгдэнэ. Ялын бодлогыг чангаруулсан хуулийн заалтыг нэгэнт батлах нь тодорхой болсон. Эндээс үзвэл, хар тамхи, мансууруулах бодисын хэрэглэдэг, энэ төрлийн гэмт үйлдсэн, үйлдэхээр санаархаж буй нөхдүүдтэй Монголын төр хатуу гараар үздэг болох нь ээ.
Г.Нацаг
Сэтгэгдэл (65)