УИХ-ын Хууль зүйн байнгын хорооны хуралдаанаар Улсын ерөнхий прокурорын саналаар УИХ-ын гишүүн Н.Номтойбаярын бүрэн эрхийг түдгэлзүүлэх шаардлагагүй гэж үзлээ. Хаалттай хуралдаанд 13 гишүүн оролцож, долоо нь бүрэн эрхийг түдгэлзүүлэх шаардлагагүй гэж үзээд байна.
Өмнө нь УИХ-ын гишүүний халдашгүй байдлын дэд хорооноос Н.Номтойбаярыг гишүүнээс нь түдгэлзүүлэх шийдвэр гаргаад байсан билээ. МАН-ын бүлгийн дарга Д.Тогтохсүрэн Н.Номтойбаяр гишүүний бүрэн эрхийг түдгэлзүүлэх асуудал Халдашгүй байдлын дэд хорооны хурлын шийдвэрээс хамаарахаар болж байна хэмээж байсан ч Байнгын хорооны нэг гишүүний саналаар түүнийг хамгаалж үлдэв.
Эндээс хаалттай хуралдсан Байнгын хорооны хуралдааны үеэр Н.Номтойбаяр гишүүний бүрэн эрхийг түдгэлзүүлэхээс татгалзсан долоон гишүүн хэн бэ гэсэн асуулт гарч ирж байна.
Хууль зүйн байнгын хороо 19 гишүүнтэй. Х.Нямбаатар гишүүн даргалдаг. Үүнээс Ж.Батзандан, Л.Болд нар АН-аас өрх тусгаарлаж ШИНЭ намд харьяалагдахаар болсон. Харин сөрөг хүчин АН-аас намын дарга С.Эрдэнэ, Б.Пүрэвдорж нар тус Байнгын хороонд хамаардаг. УИХ дахь АН-ын зөвлөлийн дарга Д.Эрдэнэбатын хэлснээр тус нам Н.Номтойбаяр гишүүний бүрэн эрхийг түдгэлзүүлэхийг дэмжинэ гэдгээ илэрхийлсэн. Тэгэхээр С.Эрдэнэ, Б.Пүрэвдорж гишүүн эсрэг санал өгсөн байж таарна. Харин ШИНЭ намын Ж.Батзандан, Л.Болд нарын гишүүн энэ асуудлаар хараахан байр сууриа илэрхийлээгүй яваа юм.
Нэг үгээр Н.Номтойбаярыг бүрэн эрхтэй нь үлдээх сонирхол МАН-ын гишүүдэд өөрсдөд нь байгаа бололтой.
Гэхдээ Хууль зүйн байнгын хорооны шийдвэрийг эцсийнх гэх нь өрөөсгөл. Учир нь, эл асуудлыг Төрийн байгуулалтын байнгын хорооны хуралдаанаар үргэлжлүүлэн хэлэлцэнэ. Улмаар хоёр Байнгын хорооны санал, дүгнэлтийг УИХ-ын чуулганы нэгдсэн хуралдаанаар хэлэлцэж, эцсийн байдлаар нууцаар санал хурааж мухарлана гэдгийг энд тодотгох хэрэгтэй.
Г.Эрхэс
Сэтгэгдэл (33)