Ерөнхийлөгч Х.Баттулга өнгөрсөн хоёрдугаар сарын сүүлчээр БНХАУ-д айлчилж, тус улсын дарга Ши Жиньпинтэй уулзсан. Хэдхэн цагийн хүрээнд хийсэн уг айлчлалаа дуусгаж, эх орондоо ирснийхээ дараа тэрбээр Улсын хоёрдугаар эмнэлэгт тусгаарлагдсан юм. Хэдийгээр Ерөнхийлөгч Х.Баттулга урьдчилсан байдлаар шинжилгээ өгөөд тусгаарлагдах шаардлагагүй байсан ч улсын хэмжээнд үйлчилж буй онц дэглэмийн дүрэм журмаа дагасан нь энэ байв. Түүнтэй хамт явсан Гадаад харилцааны сайд Д.Цогтбаатар, ОБЕГ-ын дарга, хошууч генерал Т.Бадрал, Тамгын газрын дарга Ө.Шижир нарыг 14 хоног тусгаарласан юм.

Гэтэл онц дэглэмийн үеийн хууль дүрмийг зөрчиж, бүр улсын Ерөнхийлөгчөөс давсан эрх ямба эдлэх гэсэн тохиолдол өнгөрсөн өдрүүдэд гарчээ.

Тодруулбал, Сөүл-Улаанбаатар чиглэлийн тусгай үүргийн нислэгээр ирсэн Турк улсын хоёр иргэнээс COVID-19-ийн халдвар илэрсэн болохыг ХӨСҮТ-ийн захирал Д.Нямхүү өчигдөр мэдээлсэн. Тус хоёр иргэн нь БНТУ-аас Монгол Улсад суугаа Элчин сайд Ахмет Язалын эхнэр, хүүхэд болохыг албаны эх сурвалж баталсан юм. Тэднийг Улсын хоёрдугаар эмнэлэгт, Ерөнхийлөгч Х.Баттулгын байрлаж байсан өрөөнд хэвтүүлэн эмчилж байгаа аж. Элчин сайдын гэр бүлийнхний дипломат эрх ямбыг нь харгалзан үзэж, тусгай өрөөнд оруулжээ.

Гэвч Элчин сайдын эхнэр тусгаарлагдсан өдрөөсөө эхлэн "тусгаарлагдах ёсгүй" хэмээн эсэргүүцлээ илэрхийлэн, өрөөгөө голж, монголчуудыг элдвээр доромжлох болжээ.

Мөн Улсын онцгой комиссын дарга Ө.Энхтүвшин, ОБЕГ-ын дарга Т.Бадрал, Эрүүл мэндийн сайд Д.Сарангэрэл нартай уулзуулж, тусгаарлалтаас гаргахыг шаардсан байна.

Дэлхий нийтээрээ онц дэглэмд шилжиж, хөл хорио тогтоосон байхад тусгай үүргийн онгоцоор ирсэн Туркийн Элчин сайдын гэр бүлийнхэн онцгой эрх ямба эдлэхээр элдвийн үйлдэл гаргасан нь энэ. Эмнэлгийн эмч, ажилтнуудыг хэл амаар доромжилсныг нь байя гэхэд тусгаарлалтаас гарна гэж мугуйдсаныг үнэндээ зөвтгөх аргагүй. Хууль бол хууль, дүрэм бол дүрэм. Тусгаарлалтад орсон жирийн иргэд нь 21 хоногийн хугацаагаа чанд сахиж байхад Туркийн Элчин сайдын гэр бүлд онцгой эрх эдлүүлэх тусдаа хууль, журам гэж байхгүй.

Улсын Ерөнхийлөгч нь хүртэл урд хөршдөө айлчилж ирээд 14 хоног тусгаарлагдсан өрөөнд хүртэл оруулж байхад голж шилэх эрх тэдэнд байхгүй.

Элчин сайдын эхнэр, хүүхэд онцгой эрх ямба эдэлнэ гээд толгойг нь илэх ёсгүй. Эмнэлгийн дүрэм журмыг дагаж эмчлүүлэх л ёстой. Хойноос ирээд хот минийх, хотонд ороод хонь минийх гэдэг байдлаар хандаж болохгүй. Монголчуудыг дээрлэхээд сурчихсан, энэ удаад ч тэгж хандана гэж бодож байвал тэрэн шиг худлаа юм байхгүй. Тэгээд ч Улсын Ерөнхийлөгчөөс давсан эрх ямбатай Элчин сайд гэж байх уу? Усыг нь уувал ёсыг нь дагах л ёстой. Тэр тусмаа онц байдлын үед. Энгийн үед ч энэ улсад хууль дүрэм хэрэгждэг, дагаж мөрддөг гэдгийг Туркийн Элчин сайд Ахмет Язал эрхбиш мэдэж баймаар.

Г.Эрхэс