Алтны уурхайн эзэн, жүжигчин Ж.Баясгалан урлагийн салбарынхан дундаас хамгийн баянд тооцогддог.  “Үргээлэг-1, 2”, “Бодлын хулгайч” киногоор олонд танигдсан тэрбээр экстрим спортоос болж хүнд бэртэл авч, хөл дээрээ босохын төлөө 864 хоног тэмцсэний эцэст эцсийн цэгээ хатгах тун ойрхон үлдээд буй. Яг ийм цаг үед хөгжлийн бэрхшээлтэй иргэдийн дуу хоолой болж Их хуралд нэр дэвших болсон тухайгаа зарлав.

АН-ыг сонгож, нэр дэвших марафонд өөрийн хөрөнгөө зарцуулна гэж дуугарч уриалсан хүн нь тэр.

Тиймдээ ч иргэдийн талархлыг ихэд хүлээж, дагаад Баянзүрх дүүрэг дэх нэр дэвшигчдээс хүчтэй өрсөлдөгчөөр тодроод байна.

Ингээд түүний хөрөнгө орлогийг хүргэе.

Түүний жилийн орлого нь 246.9 сая төгрөг бол гэр бүлийн орлого нь 14.8 сая төгрөг аж. Нийт 2 ТЭРБУМ 988 САЯ төгрөгийн орон сууц, барилгатай бол 737 сая төгрөгийн үнэтэй автомашин, мотоцикльтэй.

Хурдан удмын 47 адуу, сайн үүлдэрийн 158 үнээ зэргээ 1 ТЭРБУМ 235 САЯ төгрөгөөр үнэлсэн бол 1 ТЭРБУМ 290 САЯ төгрөгөөр үнэлэгдэх үнэт эдлэлтэй, хадгаламж, картын үлдэгдэл нь 223.6 САЯ, бусдад 227.8 сая төгрөгийн өртэй бол 30 сая төгрөгийн авлагатай гэжээ.

Мөн “Бугант мандал”, “Үүртгоулд”, “Кинодрамын А групп”, “Үүртгоулд энержи”, “Би Жэй Ди Жи” зэрэг компаниас хувь эзэмшдэг гэжээ.

Түүнд Баянзүрх дүүргийн иргэд итгэл хүлээлгэвэл парламентад сонгогдсон хөгжлийн бэрхшээлтэй иргэдийн анхны төлөөлөл болж чадах юм. Тэрбээр осолд орсноосоо хойш “хөгжлийн бэрхшээлтэй” гэдэг үгийг өөрчлөх ёстой гэсэн бодол тээх болсон байна. Тиймдээ ч улс төрийн замналын эхний ажлаа үүнээс эхлэнэ гэж мэдэгдсэн удаатай.

Г.Нацаг