Үндсэн хуулиар олгосон бүрэн эрхийнхээ дагуу Ерөнхий сайд У.Хүрэлсүх Засгийн газрынхаа бүтэц, бүрэлдэхүүнийг Ерөнхийлөгчтэй зөвшилцөж, УИХ-аар батлуулсан. Энэ дагуу тэрбээр ирэх дөрвөн жил ажиллах танхимынхаа 16 сайдын нэрийг МАН-ын Удирдах зөвлөлд танилцуулсан нь урьдчилсан байдлаар тодорхой болоод байна.
Удирдах зөвлөлд танилцуулсан нэрсийн хүрээнд парламентаас сайдын албыг хаших, "давхар дээл"-тэй дөрвөн гишүүнээр Л.Оюун-Эрдэнэ, Ч.Хүрэлбаатар, Х.Нямбаатар, Д.Сарангэрэл нар тодорлоо.
Ингэхдээ Л.Оюун-Эрдэнэ, Ч.Хүрэлбаатар нар улирч, Х.Нямбаатарыг Хууль зүй, дотоод хэрэг, Д.Сарангэрэлийг Байгаль орчин, аялал жуулчлалын сайдад дэвшүүлээд байна. Үлдсэн 12 сайдын хувьд парламентын гаднаас нэрийг дэвшүүлснээрээ онцлог. Эх сурвалжийн мэдээлж буйгаар У.Хүрэлсүхийн тодруулсан 16 сайдыг маргааш томилох бол баасан гарагт чуулганы нэгдсэн хуралдаанд тангараг өргөх аж.
Ийнхүү найм дахь удаагийн сонгуульд "Хүчээ нэгтгэе" уриатайгаар оролцож, 2016 оны үнэмлэхүй ялалтаа хадгалж үлдсэн Ерөнхий сайд У.Хүрэлсүхийн танхим бүрдэхээр болж байна.
Гэвч шинээр нэрийг нь дэвшүүлээд байгаа сайд нарын нэрстэй зэрэгцээд зарим асуулт хөвөрч эхэллээ. Тэдгээрийн нэг нь УИХ-ын гишүүн асан Ж.Энхбаяр. Сонгуулийн өмнөхөн түүнийг нэр дэвшүүлэхгүйгээр намынхаа гал тогоог зангидаж ажиллахаар болсон тухай яриа гарч байв. Тэр нь ч батлагдаж Ж.Энхбаяр нэр дэвшээгүй, МАН-ын арын албыг хариуцаж ажилласан.
Улмаар МАН ялалт байгуулсан тохиолдолд түүнийг Батлан хамгаалахын сайдаар очно гэж байв. Гэвч Үндсэн хуулийн нэмэлт, өөрчлөлтийн хүрээнд ажиллахаар болсон анхны Засгийн газрын бүрэлдэхүүнд тэрбээр багтсангүй, түүнийг багтаасангүй. Харин түүнтэй хамт сонгуулийн штабаа удирдаж оролцсон Я.Содбаатарыг Шадар сайдад дэвшүүлээд байна.
2016-2020 оны парламентад УИХ-ын гишүүнээр ажиллах хугацаандаа ЖДҮ-ээс эхлээд хэд хэдэн Засгийн газрын Тусгай сангаас зээл авсан асуудалд нэр холбогдсоныг эс тооцвол Ж.Энхбаярын хувьд намынхаа туршлагатай, танигдсан боловсон хүчний нэг. УИХ-д гурван удаа сонгогдож, Батлан хамгаалахын сайдаар ажиллаж байсан туршлагатай.
Харин энэ удаад У.Хүрэлсүхийн Засгийн газарт сайдаар очих хамгийн өндөр магадлалтай хүний нэгээр тодроод байсан Ж.Энхбаярыг МАН томилгооны гадна үлдсэн шалтгаан удахгүй тодорхой болох болов уу?
МАН Ерөнхий нарийн бичгийн дарга Д.Амарбаясгалан "ЖДҮ-ийн асуудал нь нэг талдаа ёс зүйн алдаа дутагдал, нөгөө талаар тухайн хүн нь хууль, шүүхээр буруутай гэдэг нь тогтоогдоогүй гэдгийг ард түмэн, ялангуяа хэвлэл мэдээллийнхэн маань анхаарах хэрэгтэй. Ёс зүйн хариуцлагаа хүлээж, сонгуульд нэр дэвшихээс хойшоо суусан гишүүдэд мэдээж насан туршид нь хариуцлага хүлээлгэнэ гэж байхгүй. Тодорхой хэмжээнд улс төрийн хариуцлага хүлээлгэж байгаа. Магадгүй, намын томилолт өгч ажилуулахыг үгүйсгэхгүй. Тиймээс ЖДҮ-д холбогдсон хүн сайд болно, болохгүй гэж хэлэхэд эрт байна" хэмээн хэд хоногийн өмнөхөн мэдэгдэж байсан удаатай. Харин ЖДҮ-ийн асуудалд нэр холбогдож сайдын албан тушаалаасаа бууж байсан Я.Содбаатарын нэрийг Шадар сайдад дэвшүүлсэн нь Д.Амарбаясгалангийн яриа оргүй биш байсныг баталж орхилоо.
Г.Эрхэс
Сэтгэгдэл (54)