УИХ-ын дарга Г.Занданшатар Хуулийн бодлогын зөвлөхөөрөө УИХ-ын гишүүн асан Д.Лүндээнжанцанг томилжээ. Харин 31 дэх Ерөнхий сайд У.Хүрэлсүхийн хуулийн бодлогыг танхимынх нь сайд асан Ц.Нямдорж хариуцна. Энэ хоёр эрхмийг томилсон шалтгаан гэхээсээ сайн, муу, эерэг, сөрөг сэтгэгдэл хөвөрсөн нь өнгөрсөн өдрүүдийн гол сэдэв байв. Байх нь ч аргагүй.
Ардчилсан нийгмийн амин судас болсон нийгмийн зохицуулалтыг хангах чиг үүрэгтэй Хууль зүйн салбарыг удирдан чиглүүлж, зангидаж ирсэн Ц.Нямдоржийн өнгөрсөн 20 жилийн хугацаанд тогтоосон фигур.
Монгол Улс Ардчилсан шинэ Үндсэн хуулиа баталж, Байнгын ажиллагаатай парламентын тогтолцоонд шилжсэн 28 жилд болж өнгөрсөн процесс бүрийг нэгд нэгэнгүй гадарлах, хаана нь алдаатай явж ирснийг хамгийн сайн мэдэх хүн нь Д.Лүндээжанцан. Ардчилсан Үндсэн хуулийн эхийг барилцаж, өнгөрсөн тавдугаар сарын 25-наас хүчин төгөлдөр мөрдөж эхэлсэн нэмэлт, өөрчлөлтийг гардан гүйцэтгэхэд түүний оролцоо их байсан юм. Аль аль нь хийдгээ хийсэн, хэлэх үгтэй, үлдээсэн мөртэй, өөрийн гэсэн орон зайтай парламентч.
Хэдийгээр УИХ-ын ээлжит сонгуульд нэр дэвшээд хоёулаа бүдэрсэн ч УИХ-ын дарга, Ерөнхий сайд гэсэн засаглалын хоёр салаа мөчир, институцид зөвлөхөөр ирсэн нь сайн хэрэг. "Бай"-гаа оносон шийдвэр.
Ахмад улстөрчид нь шинэ залуу үедээ зайгаа тавьж өгөх ёстой гэх шүүмжлэл нийгэм, улс төрийн хүрээнд үе үехэн өдөлдөг ч төрд хэрэгтэй фигурууд нь Ц.Нямдорж, Д.Лүндээжанцан нар мөн гэдэгтэй маргах нэгэн гарахгүй болов уу.
Тэгээд ч Ерөнхийлөгчийн Тамгын газрын дарга асан З.Энхболд “Улс төрийн өндөр мэргэшилтэй гэдэг нь ядаж л намын гишүүн, өндөр албан тушаал хайж байсан хүн гэж ойлгож байна. Улс төрчдийг томилж болохгүй гэж ойлгож болохгүй. Мөн багш нарын цуглуулга болж болохгүй. Үндсэн хуулийн шаардлагын дагуу хүмүүсээ нэр дэвшүүлсэн. Хүмүүсийн тогтсон ойлголт өөрч хуулийн шаардлага өөр гэдгийг бас ойлгох хэрэгтэй” хэмээгээд салбартаа танигдсан гэхээсээ намын томилгоотой Г.Туулхүү, Б.Буяндэлгэр, Ц.Нанзаддорж нарыг Үндсэн хуулийн цэцийн гишүүнээр томилуулж байсан нь саяхан, хоёр жилийн өмнөх үйл явдал.
Цэцэд хуулийн салбартаа танигдаж, хүлээн зөвшөөрөгдсөн, мэргэшсэн хуульч, Үндсэн хуулийн манаач хэрэгтэй атал Төрийн тэргүүнийх нь зүгээс өндөр албан тушаал хашиж байсан улстөрч гэх шинэ тодотголыг оруулж төлөөний хүмүүсээ "шахаж" байсан нь энэ. Цэцийн дээр хөх тэнгэр байдагтай агаар нэг Монгол Төрийн толгойд хууль байдгийг сахиулж, сануулах, чиглүүлэх нэгэн л хэрэгтэй. Юу үнэн энэ л үнэн.
Г.Эрхэс
Сэтгэгдэл (33)