У.Хүрэлсүхийн Засгийн газраас гурван сайдыг эгүүлэн татах асуудал их яригдсан. Үүнд Боловсрол, шинжлэх ухааны сайдын нэр багтдаг. Салбараа удирдаж эхэлснээсээ хойш л багагүй хэл ам дагуулж, шүүмжлэл хүртээд буй нэгэн.
Тэгвэл БШУ-ны сайд Л.Цэдэвсүрэнг салбараа удирдах чадамжгүй гэж үзэн багш нарын зүгээс албан тушаалаас нь огцруулахыг шаардах санал хурааж эхэлжээ. Тодруулбал, БШУЯ-ны зүгээс Ерөнхий боловсролын лаборатори сургуулиудын статусыг үгүй болгох асуудал албаны түвшинд яригдаж эхэлжээ. Үүнтэй холбогдуулан яамнаас лаборатори сургуулиудын захирлуудтай холбогдож дарамт үзүүлж буй гэх.
Өнөөдрийн байдлаар манай улсад 47 лаборатори сургуульд 5000 гаруй багш, ажилчид ажиллаж байна. Лаборатори сургууль нь судалгаа, арга зүйн туршилтыг зохион байгуулж ажиллах үүрэгтэй.
УИХ-аас 2012 оны тавдугаар сарын 9-нд Боловсролын тухай хуульд нэмэлт, өөрчлөлт оруулж энэ хүрээнд Засгийн газраас мөн оны тавдугаар сарын 23-ны өдөр 179 дүгээр тогтоол баталж лаборатори сургуулиудыг байгуулж байжээ. Монголын багш нарын үйлдвэрчний эвлэлийн холбооноос сургалтын цөм хөтөлбөрөө үргэлжлүүлэн сайжруулж, дэлхий дахинд хүлээн зөвшөөрөгдөхүйц үндэсний хөтөлбөр боловсролын болгох, лаборатори сургуулийн статусаа цаашид үргэлжлүүлэх зүйтэй гэсэн саналыг гаргажээ.
Цар тахлын өнөөгийн нөхцөл байдалд олон өрхийн орлого, амьжиргаанд хүндээр нөлөөлж, аж ахуйн нэгжүүд хаалгаа барихад хүрээд байна. Лаборатори сургуулиудыг татан буулгаснаар багш нарын орлого 15-30 хувиар буурна. Мэдээж үйл ажиллагаа нь тасалдаагүй байгууллагын ажилтан зээлээ хойшлуулах боломжгүй учраас зээлтэй багш нарт энэ нь хүнд цохилт болж буй аж.
Тиймээс Засгийн газраас уг шийдвэрээ эргэн харахыг хүсэж, салбараа удирдах чадамжгүй сайдаа огцрохыг шаардаж байгаа аж.
Ер нь улсын хөгжил хүнээс шууд хамааралтай. Хүнийг багш хөгжүүлж, төлөвшүүлдэг. Уг нь багшийн цалин урамшууллыг хамгийн өндрөөр үнэлж, энэ хэмжээгээр тус сургуульд элсэгчдийн чадвар чадамж, тавих шалгуур нь өндөр байх учигтай. Гэвч манай улсад эсрэгээрээ. Бага цалинтай багшийн ажилд авьяас чадвар, сурлагаараа манлайлдаг хэн ч орохыг хүсэхгүй байна гэж дүгнэх судлаачид ч цөөнгүй бий. Тиймээс "халаас нимгэн" багш нараа санхүүгийн эрх чөлөөнд нь хүргэж байж л хүний хөгжил, үр дүн гэдэг зүйлийг хүсэх нь зөв байх.
А.Сүх
Сэтгэгдэл (23)