УИХ-ын гишүүн Б.Пүрэвдорж их хэмжээний согтолттойгоор автомашин жолоодож, сум шиг хурдлах машин нь хэд годройтон нисч, замын хашлага даван хашаа мөргөн зогссон талаар бид мэдээлж байсан билээ. Энэхүү бичлэг ч цахим орчинд ил болж, нийгмийг цочирдуулсан. Азаар тэрбээр ноцтой гэмтэл аваагүй ч түүний ёс суртахуун болоод УИХ-ын гишүүнээс эгүүлэн татах хүртэл асуудлыг хөндөх шаардлагатай болж байна.

Хамгийн хачирхалтай нь, чуулганы танхимд хиймлээр шударга царайлж суудаг тэрбээр “Зөрчлийн хэрэгт шийтгүүлсэн хуулийн этгээдэд өршөөл үзүүлэх тухай” хуулийн төслийг 2020 оны арванхоёрдугаар сарын 28-ны өдөр өргөн барьсан билээ. Тэрбээр "2017 оны долоодугаар сарын 1-нээс хэрэгжүүлж эхэлсэн Зөрчлийн тухай хуулиар давхардсан тоогоор 4 сая иргэн 650 орчим тэрбум төгрөгөөр торгуулсан байна. Тэгэхээр энэ хууль бол төсвийн цоорхойг нөхөх хэмжээний торгуультай ард иргэдийн халаасыг хоосолсон ийм хууль болчихоод байна. Цар тахлын үед иргэдийн орлого буурч байгаа. Тэгвэл энэ үед Өршөөлийн тухай хууль нэн шаардлагатай. Урьдчилсан байдлаар нэг сая гаруй иргэнд хүрнэ гэсэн тооцоололтой байгаа. Төслөөр бол, иргэн, ААН-ын 10 сая хүртэлх торгуулийг чөлөөлөхөөр тусгасан байгаа. Ер нь 5-10 сая төгрөгийн торгууль төлөх нь иргэн хүний хувьд хүнд шийтгэл. 3-4 жилийн хугацаанд нийтдээ 700 орчим хүн яг ийм дүнгээр торгууль төлсөн байна. Ихэнх нь нэг сая төгрөгөөс доош дүнгээр торгуульдаг буюу замын зөрчил байна. Торгуулиа төлж чадаагүйгээс болж тэнсэн харгалзах ял аваад яваа тохиолдол цөөнгүй байна. Тиймээс иргэдийн амьдрал хүнд байгаа энэ үед зөрчлийн торгуулиа төлж чадахгүй байгаа иргэн, ААН-ыг өршөөх хуулийн төслийг өргөн барьсан гол зорилго нь энэ юм. Хамгийн удаан, ихээр хуримтлагддаг торгууль бол замын зөрчлийн торгууль байгаа. Тиймдээ ч  замын зөрчлийн торгуулийг нэг удаа өршөөх заалтыг  оруулсан" хэмээж байв. Энэ цагаас хойш иргэдийн дунд хүлээлт үүсч, Зөрчлийн тухай хуулиар торгуулсан дийлэнх нь Өршөөлийн хууль гарахыг хүлээн торгуулиа төлөхгүйгээс Төрийн сангийн мөнгөн хуримтлал багасч, энэ нь хүндрэл учруулж эхэлсэн талаар Тээврийн цагдаагийн албаныхан хэлж байсан юм. Гэвч өнөөдрийг хүртэл таг чиг.

Хамгийн шившигтэй нь, УИХ-ын эрхэм гишүүн бусдын бус өөрийнхөө төлөө энэхүү хуулийн төслийг санаачилсан нь ил болж, нүүр хийх газаргүй болж байна. Тэрбээр хурд хэтрүүлэн автомашинтайгаа “нисэх” бол энүүхэнд. Байнга л замын хөдөлгөөний дүрэм зөрчиж, дураараа авирлаж явдаг нэгэн аж.  Учир нь, түүний нэр дээр бүртгэлтэй сая хөлөглөж явсан 63 78 УНЦ дугаартай “Ниссан Тиана” маркийн автомашины эзэн (Б.Пүрэвдорж гишүүн)  өнөөдрийг хүртэл төлөөгүй нийт 43 удаагийн торгуультай гэдэг нь ил боллоо. Задалбал, 20 мянган төгрөгөөр 39 удаа, 50 мянгаар хоёр удаа, 25 мянгаар нэг удаа, арван мянгаар нэг удаа гээд нийт тооцоод үзэхээр, 915 мянган төгрөгийн торгуулиа тэрбээр огт төлөлгүй явж иржээ. Энэ нь сүүлийн хэдэн жилийнх бөгөөд заримдаа бүр сар сарын зайтай  эсвэл нэг сард хэдэнтээ торгуульж иржээ.

Замын хөдөлгөөний дүрмийг ингэж баримталж, дээр нь холбогдох албаныхны тавьсан шаардлага, торгуулийг үл тоон ирсэн Б.Пүрэвдорж гишүүн ичих ч үгүй иргэдийн нэрийг барин өөртөө зориулж хууль гаргах санаархалтай байсан нь илт юм. Жирийн иргэн байсан бол Зөрчлийн тухай хуулиар оноосон торгуулиа төлөөгүй тохиолдолд шүүх захирамж гарган, ШШГЕГ-ынхан албадан төлүүлдөг. Гэтэл эрхэм гишүүнд энэ бас үйлчилдэггүй бололтой.

Энэ бүхэн Б.Пүрэвдорж гишүүнийг эгүүлэн татан, асуудлыг УИХ-ын Ёс зүй, хариуцлагын хороогоор ойрын хугацаанд хэлэлцэх, тодруулбал, Б.Бат-Эрдэнэ гишүүн та чухалчлан авч үзэх шаардлагатай болж байна. Ичих булчирхайгүй энэ гишүүндээ хариуцлага тооцно гэж найдъя.

У.Тэргэл