Монгол бөхийн аварга цолтой хүн бусдад зөв үлгэр дуурайлал үзүүлэх хамгийн сайхан. Тэдний хэлсэн үг, хийсэн үйлдлээр нь залуус үлгэрлэдэг юм.
Өнгөрсөн жил залуу аварга Н.Батсуурь сэтгүүлчдэд мэдээлэл хийх үедээ допинг хэрэглэсэн зарим бөхийн барилдах эрхийг хоёр жил, заримыг нь зургаан сараар хасдаг байж болохгүй гэсэн утгатай үг хэлж билээ. Түүний энэ үг, үйлдлийг бөхчүүд болон бөх сонирхогчид талархан хүлээн авсан.
МҮБХ-ны удирдлагууд ч энэ тал дээр хатуу байр суурьтай болж эхэлсэн. Допингийг эсэргүйцэж бусдыг уриалах түүний туйлын зөв. Гэвч хэлсэн үгнийхээ дараа аварга Н.Батсуурь допингийн шинжилгээнд бүдэрч, барилдах эрхээ хасуулсан нь 11 сар болсон. Уг нь барилдах эрхээ хоёр жилээр хасуулах ёстой байх аа, аварга аа.
Түүний хэлсэнчлэн шийтгэлийг тэгш, шударга үүрүүлэх ёстой гэвэл тэрбээр энэ жилийн наадамд зодоглохгүй юм. Дараа жилийн наадамд ч барилдах эрхгүй.
Гэвч өдийг хүртэл түүнтэй адил допинг хэрэглэсэн хоёр бөх болоод тэр өөрөө ч энэ жилийн наадамд зодоглохгүй гэдгээ зоригтой хэлж чадахгүй байна. Хэлсэн үгэндээ эзэн болж, энэ жилийн наадмыг өнжвөл зөв жишиг тогтох юм шүү.
Б.Жаргал
Сэтгэгдэл (21)