Тулгар төрийн 2230, Их Монгол Улс байгуулагдсаны 815, Ардын хувьсгалын түүхт 100 жилийн ойн баяр наадмыг Засгийн газрын шийдвэрээр үзэгчгүйгээр тэмдэглэн өнгөрүүлэхээр шийдвэрлэв. Түүхт ойн баяр наадамд 1024 бөх барилдах бөгөөд энэ жилийн наадамд дархан аварга Х.Баянмөнх, Б.Бат-Эрдэнэ нар барилдахгүй ба хүндэтгэл үзүүлж, цолыг нь дуудах юм байна. Харин дархан аварга Г.Өсөхбаяр Сүүж хайрханд нутгийн залуустайгаа наадмын бэлтгэлд гарчээ. Тэгвэл дархан аварга А.Сүхбат энэ наадмаар барилдах эсэх талаар өөрөөс нь тодруулга авлаа.

-Та сайхан зусч байна уу. Шууд асууя. Та энэ наадмаар зодоглох уу?

-Би энэ жил барилдах эсэхээ шийдээгүй байна.

-Та бэлтгэл сургуулилт хийж байна уу?

-Миний хувьд хөлсөө тогтмол гаргадаг.

-Саяхан таны чөлөөт бөхийн анхны багш О.Мөнхбат гавьяат дасгалжуулагч боллоо. Танд төрж буй сэтгэгдэл?

-Хөл газар хүрэхгүй баярлаж байна. Түүний удирдлага дор бэлтгэл сургуулилт хийж байсан “Шонхор” клубын унаган шавь нар хүлээн авч баяр хүргэсэн.

-Энэ жил хэн түрүүлэх таамаг байна уу?

-Хэн түрүүлэхийг таамаглаж байна. Гэхдээ наадмаас өмнө ил хэлэх зохимжгүй юм болов уу.

-Хоёр жилийн өмнөх баяр наадмын түрүү бөхийг урьтаж хэлж байсан болохоор асууж байгаа юм?

-Тухайн өдөр хэн гэгч бөхийн аз од гийж, биоритм нь өндөр байх юм, тэр бөх түрүүлнэ.

-Залуу аваргууд хэр барилдах бол?

-Н.Батсуурь аваргыг энэ наадмаар барилдуулахыг би мэдэхгүй. Мөн Э.Оюунболд арслан цолтой барилдах уу, аварга цолтой зодоглох уу гэдгээс наадмын түрүү бөхийн таамаг өөр байж болох талтай.

-Үзэгчгүй наадам бөхийн сэтгэл зүйд хэр нөлөөлдөг вэ?

-Өнгөрсөн жил үзэгчгүй наадам болсон. Энэ жил ч үзэгчгүй болно. Бөхчүүдийн хувьд сэтгэл зүйд нь нөлөөлөх асуудал байхгүй.

Б.Жаргал