Сүлжээний бизнест хөрөнгөө алдсан хүмүүсийн өмгөөллийн зардлыг төсвийн мөнгөнөөс гаргуулна хэмээн Хөвсгөл аймгийн ИТХ-ын дарга Г.Мөнгөнхуяг санал гаргав.

Тодруулбал, Хөвсгөл аймгийн ИТХ-ын ээлжит бус 13 дугаар хуралдаанаар аймгийн 2022 оны төсвийн тодотголын төсөлд “Бэлтэс Мөрөн” ХХК-ийн үйл ажиллагаанаас үүдэлтэй хохирогчдын төлөөллийн ажлын хэсгийн үйл ажиллагаа, цагдаагийн байгууллагатай хамтран ажиллах болон өмгөөллийн зардалд 127 сая төгрөгийг аймгийн ИТХ-ын гэмт хэргийн зардлаас шийдвэрлэх саналыг ИТХ-ын дарга Г.Мөнгөнхуяг оруулсан. Тэрбээр хурлын үеэр "Энэ хэрэгт олон хүн хохирогч болсон. Зарим нь өрнөөсөө болж Шархадны эмнэлэгт хэвтэж, 4,5 хүн хүлээж байгаад нас барсан нь ч бий. Энд суугаа хүмүүсийн ойр дотно олон хүн хохирогч болсон л байгаа.

Миний ойр дотнын 10 гаруй хүмүүс хохирсон байсан. Би аваагүй, хохироогүй юм чинь гээд чимээгүй  өнгөрч болохгүй. Хүнлэг байх хэрэгтэй. Хохирогч болсон хүмүүсийн 10 орчим хувь нь өмгөөлөгч авах чадваргүй буюу мөнгөгүй.

Тэдний хэргийг нийтэд нь тооцоод үзэхээр 300 орчим сая төгрөгийг өмгөөлөлд зарцуулахаар байна. Тиймээс энэ хэргийн хохирогчдын өмгөөлөлд тусламж үзүүлэх үүднээс 127 сая төгрөгийг төсвийн мөнгөнөөс гаргуулъя" гэв. Харин тус аймгийн Ардчилсан намын бүлгээс дээрх мөнгөнөөс 100 сая төгрөгийг хасах шийдвэр гаргасан байна.

Өөрсдийн шунал, залхуу зангаасаа болж амар хялбар аргаар мөнгө олох  гэсэн хүмүүсийг өрөвдөж бидний, таны татварын мөнгийг зарцуулах эрхийг тэд эдлэх гэнэ. Ийм хүмүүст зарцуулах төсвийн мөнгө гэж байх ёсгүй. Хүнлэг байх ёстой гэж ИТХ-ын дарга нь ярьж байна. Сайн дураараа, гэнэт баяжихыг хүсэгчдийг өрөвдөхөөс илүү иргэнийнхээ боловсролд энэ мөнгөө зарцуулбал эргээд ийм луйварчдын өгөөш болохгүй л болов уу.

Т.Мөнхжаргал