Хөгжлийн банкны 100 том зээлдэгчийг trends.mn сайт зарлаж байсан. Энэ жагсаалтын 56 дугаарт “Их Монгол барилга” ХХК “Хэрэм зам” ХХК-ийн түншлэлийн авсан 13 тэрбум 123 сая төгрөгийн зээл байдаг. Энэ хоёр компанийн түншлэл Мөрөн-Тариалан чиглэлийн 25 км авто замыг барихаар Хөгжлийн банкнаас 2013 оны наймдугаар сарын 5-ны өдөр ийм хэмжээний зээл авсан байдаг. Энэ үед Хөгжлийн банкны захирлаар Н.Мөнхбат ажиллаж байв. “Их Монгол барилга” ХХК-ийн түншлэлийн энэ зээлийн эргэн төлөгдөх хуваарьт хугацаа 2022 оны арваннэгдүгээр сарын 4 бөгөөд 6.1 хувийн хүүтэй, 9.3 жилийн хугацаагаар авсан гэсэн үг.

Хөгжлийн банкнаас ийм хэмжээний зээл авсан хоёр компанийн түншлэлд байгаа “Их Монгол барилга” ХХК нь анхаарал татаж буй бөгөөд энэ нь өдгөөгийн УБТЗ-ын дарга Х.Хэрлэнтэй нэр холбогддог.

Хөгжлийн томоохон хөтөлбөрүүдийг л санхүүжүүлэх зорилготой байсан Хөгжлийн банкны зээлд ингэж хамрагдаж байсан “Их Монгол барилга” ХХК нь мөн жижиг, дунд бизнес эрхлэгчдийг дэмжих ЖДҮХС-гийн зээлээс мөн аваад амжсан байдаг бөгөөд энэ зээлийг авахад нь тухайн үед Ашигт малтмал, газрын тосны газрын даргаар ажиллаж байсан Х.Хэрлэн нөлөөлсөн байж болзошгүй баримт байдаг.

ЖДҮХС-гийн захирал асан С.Төгсбилэг мэдүүлэгтээ “Б.Батзориг сайд надад Х.Хэрлэн даргатай холбогдож зээлд хамрагдах аж ахуйн нэгжийн нэрийг аваарай хэмээсэн. Энэ дагуу холбогдоход “Их Монгол барилга” ХХК-ийн нэрийг Х.Хэрлэн дарга өгсөн” гэсэн утгатай зүйлийг ярьсан талаар бид өмнө нь мэдээлсэн. Өөрөөр хэлбэл, ЖДҮХС-гаас 500 сая төгрөгийн хөнгөлөлттэй зээлийг өдгөөгийн УБТЗ-ын дарга Х.Хэрлэнг АМГТГ-ын дарга байх үед нь яриулж авч байсан “Их Монгол барилга” ХХК Хөгжлийн банкнаас мөн 13 тэрбум 123 сая төгрөгийн бага хүүтэй зээлийг авч байжээ.

Т.Мөнхжаргал