Эрчим хүчний сайд Б.Чойжилсүрэн бараг л томилогдсон даруйдаа нэгэн халаа сэлгээ хийсэн нь Баруун бүсийн эрчим хүчний системийн удирдлагыг солих байлаа. Халаа сэлгээ бол ажлыг сайжруулахын тулд хийгддэг бол Б.Чойжилсүрэн сайдын энэ удаагийн томилгоогоор мэргэжлийн хүнийг нь чөлөөлж, оронд нь бөх хүнийг тавьжээ.

Энэ томилгоог Улаанбаатарыг цементэн ширэнгэ болгосон Эрчим хүчний сайд баруун хязгаарыг тог цахилгаангүй жинхэнэ зэрлэг ширэнгэ болгохоор шийджээ гэж тайлбарлаж болохоор байна.

Учир нь, Баруун бүсийн эрчим хүчиний систем ТӨК-ийн монтероос нь эхлээд инженер, ерөнхий инженер, захиралыг нь хүртэл дэвшиж хийсэн Монгол улсын зөвлөх инженер Д.Ганхүлэгийг албан тушаалаас нь хууль бусаар чөлөөлж өөрийнх нь сонгуульд явдаг Увс аймгийн МАН-ын даргад өрсөлдөөд ялагдсан, мэргэжлийн бус, аймгийн заан П.Баттулгыг томилж өнөөдөр ажлыг нь хүлээлцэж байгаа юм.

П.Баттулга нь Б.Чойжилсүрэнг Сангийн сайд байхад Баянгол дүүргийн Төрийн банкны захирлын үүрэг гүйцэтгэгчээр ажиллаж шаардлага хангахгүй учираас жинхэлж чадахгүй байсаар халагдсан нэгэн аж. Мөн Төвийн бүсийн эрчим хүчний системийн захралыг сольж, "Зочин бууз"-ын эзэн Ж.Ганбаатар гэгчийг томилохоор АТГ-д бичиг хүргүүлсэн ч шаардлага хангахгүй гэсэн хариу аваад байгаа юм. Гол нь эдгээр томилгоонууд нь бүгд хууль бус ажээ.

Энэ жил цахилгаан эрчим хүч ачааллаа даахгүй тоггүй болох тун эрсдэлтэй байгаа ч Б.Чойжилсүрэн сайд Төв болон Баруун бүсийнхээ эрчим хүчний системийг мэргэжлийн бус хүнээр удирдуулахаар тавьж байгаа нь байдлыг улам хүндрүүлэхээр байна. Хэрэв бүгдээрээ гэрэл цахилгаангүй болвол хариуцлагыг нь хэн хүлээх вэ? Сайд уу, эсвэл түүний томилсон бөх үү?

С.Сүлд