Тээврийн цагдаагийн газраас цаг үеийн асуудлаар мэдээлэл хийж байна. 

Тэрбээр “Дэлхий дээр Зам тээврийн ослын улмаас өдөрт 3500, жилд 1.3 сая орчим хүн нас барж, 50 сая орчим хүн гэмтэж бэртдэг гэсэн НҮБ-ын судалгаа бий. Зам тээврийн ослын тэргүүлэх арван шалтгаан байдаг. Энэхүү арван шалтгаан 2030, 2060 онд хэвээр байна гэсэн дүгнэлтийг хийсэн. Дэлхийн эрүүл мэндийн байгууллагаас Монгол Улсын хүн амын нас баралтын 50 шалтгааныг нэрлэсэн. Үүний эхний аравт зам тээврийн осол орж байна. Зам тээврийн ослын улмаас манай улсад сүүлийн арван жилийн байдлаар 5155 хүн нас барсан байна. Энэ оны эхний арван сарын байдлаар 477 хүний амь нас эрсэдсэн байна.

Зам тээврийн ослын гол шалтгаан бол согтууруулах ундаа хэрэглэсэн үедээ жолоо барих, хурд хэтрүүлэх, бүрэн бус тээврийн хэрэгсэлтэй тээврээр замын хөдөлгөөнд оролцож байгаа зэрэг Замын хөдөлгөөний дүрмийн 237 орчим заалтын хэрэгжилтийг хангаж чадахгүй байна. Үүнээс шалтгаалж эд материал, хүний амь нас эрсдэж байна. 

Энэ оны арван сарын байдлаар 477 хүн нас барж, 694 хүүхэд гэмтсэн байна. Согтуугаар тээврийн хэрэгсэл жолоодсон 47.102 зөрчил илэрсэн байна. Нийт зөрчлийн 62,2 хувь нь согтуугаар тээврийн хэрэгсэл жолоодсон зөрчил байна" гэв. 

Д.Батчулуун