НЗД-ын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр үүрэгт ажлаа аваад сарын хугацаа өнгөрчээ. Ажлаа авсан даруйдаа удахгүй эхлэх хичээлийн шинэ жилийг элдэв асуудалгүй угтахад анхааран ажиллаж байна.
Хоёр долоо хоногийн өмнө тэр 60 жилийн түүхтэй нийслэлийн 29 дүгээр сургуулийн засварын ажилтай танилцсан. Тэгвэл өчигдөр засварын ажилтай дахин танилцаж, үүрэг чиглэл өглөө.
Тэртээ 1964 онд байгуулагдсан тусгай хэрэгцээт 29 дүгээр сургууль нь 1989 онд одоогийн энэ байрандаа хичээллэж эхэлсэн түүхтэй. Гэвч өнөөдрийг хүртэл нэг ч удаа их засвар хийгдэж байгаагүй аж. Түүнчлэн дулааны алдагдал ихтэй байснаас үүдэн өвлийн улиралд сурагчид нь гадуур хувцастайгаа хичээлд суудаг байжээ.
Өнгөрсөн долоо хоногт засварын ажлын гүйцэтгэл 20 гаруй хувьтай байсан бол одоогийн байдлаар 60 гаруй хувьтай байна. Цонх суурилуулалт, сантехникийн ажлууд бүрэн хийгдсэн, дотор заслын ажил дуусах шатандаа байгаа юм.
НЗД-ын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр засварын ажлыг нийслэлийн төсвийн хөрөнгө оруулалтаар гүйцэтгэж байгааг онцоллоо. Үүнээс гадна гүйцэтгэгч компанийнханд цонх, хаалганы дулаалгыг сайтар гүйцэтгэж дулаан алдалдалгүй байлгах үүрэг өглөө.
Гүйцэтгэгч компанийн хувьд батлагдсан хуваарийн дагуу, уртасгасан цагаар ажиллаж байгаа учир энэ сарын 25-ны өдөр гэхэд засварын ажлыг дуусгах төлөвлөгөөтэй байгаа гэнэ.
Ташрамд, Л.Хосбаяр нь Хууль зүй, дотоод хэргийн яаманд байхдаа хүүхэд хамгаалал, боловсролын чиглэлээр олон ажлыг хийж байсан.
Тухайлбал, Сэлэнгэ, Сүхбаатар, Увс аймаг, Налайх, Сонинохайрхан дүүрэгт гэр бүлийн хүчирхийллийн хохирогч, эмэгтэйчүүдэд зориулсан Түр хамгаалах байрыг байгуулах ажлыг амжилттай хэрэгжүүлсэн. 2024 оны эхний хагас жилийн байдлаар нийт 1512 хүн тус газраас үйлчилгээ авчээ.
Мөн Азийн хөгжлийн банктай хамтран Цэцэглэн хөгжсөн, сөрөг нөлөөнд тэсвэртэй Ази, Номхон далайн бүс нутгийг цогцлоох Японы сангийн санхүүжилттэй хэрэгжсэн “Хүүхэд, эмэгтэйчүүдийн эсрэг гэр бүлийн хүчирхийлэлтэй тэмцэх” төслийн захирлаар сайн дураар, цалингүйгээр 2021-2023 онд ажилласан. Тэрбээр хэрэгжилт удаашралтай байсан төслийг өөрийн туршлага, мэргэжил, арга зүйн удирдлагаар хангаж, төслийг амжилттай хэрэгжүүлэхэд гол үүрэг гүйцэтгэсэн.
Л.Баяр
