Норвегийн хааны гэр бүлийн нэр хүндтэй холбоотой нэгэн дуулиант хэрэг шүүхийн шатанд эцэслэгдэж, олон нийтийн анхаарлын төвд ороод байна. Осло хотын шүүхээс Норвегийн угсаа залгамжлах хан хүүгийн дагавар хүү болох Мариус Борг Хойбиг хэд хэдэн ноцтой гэмт хэрэгт буруутай гэж үзэн шийдвэр гаргалаа. Тэрбээр 29 настай бөгөөд Норвегийн угсаа залгамжлах хан хүү Хааконы эхнэрийн дагавар хүү юм.

Шүүхийн бүрэлдэхүүн түүнийг хүчингийн хэрэг үйлдсэн, гэр бүлийн хүчирхийлэл болон биед халдсан хэрэгт оролцсон буруутай гэж дүгнэсэн байна.

Ингэснээр түүнд 4 жилийн хорих ял оноосон бөгөөд энэ нь прокурорын зүгээс анх санал болгосон ялтай харьцуулахад харьцангуй хөнгөн шийтгэл болжээ. Прокурорууд өмнө нь түүнд 7 жилээс дээш хорих ял оногдуулах санал гаргаж байсан юм. Шүүх хурлын үеэр яллагдагч талын өмгөөлөгчид түүнийг буруугийн хамгийн хүнд заалтуудад гэм буруугүй хэмээн маргаж, хэрэгт нотлох баримт хангалтгүй гэж үзсэн байна. Гэсэн ч шүүх нотлох баримтуудыг дүгнэн дээрх шийдвэрийг гаргасан байна.

Тэрбээр нь шүүхийн шийдвэрийг хүлээн зөвшөөрөхгүй байгаа бөгөөд давж заалдах эрхээ ашиглах боломжтой гэж эх сурвалжууд мэдээлжээ. Энэхүү хэрэг нь Норвегид ихээхэн шуугиан дэгдээж, хааны гэр бүлийн нэр хүнд, ил тод байдал, хариуцлагын асуудлыг дахин хөндөж байна. Олон нийт болон хэвлэл мэдээллийн хэрэгслүүд энэ хэргийг “хааны гэр бүлийн орчин дахь хамгийн дуулиант хэрэг” хэмээн тодорхойлж байгаа юм.

Норвегийн хааны ордон албан ёсны мэдэгдэл хийхдээ шүүхийн шийдвэрийг хүндэтгэж байгаагаа илэрхийлсэн ч хэрэгтэй холбоотой нарийн тайлбар өгөөгүй байна.

Энэхүү шийдвэр нь Норвегийн хууль шүүхийн тогтолцоо хэн нэгний нийгмийн байр сууринаас үл хамааран адил үйлчилж байгааг дахин харуулсан үйл явдал болж байна. Харин цаашид давж заалдах шатны шүүхийн шийдвэр энэ хэргийн эцсийн хувь заяаг тодорхойлох юм.

Л.Баяр