АНУ-ын Ерөнхийлөгч Дональд Трампын засаг захиргааны Цагаан ордны хэвлэлийн нарийн бичгийн даргаар шинээр томилогдсон Кэти Захариа Калифорни мужийн хуульчийн эрх олгох шалгалтад тэнцээгүй атлаа сүүлийн хоёр жилийн хугацаанд өөрийгөө “өмгөөлөгч” хэмээн тодорхойлсон нийтлэл, нэвтрүүлгийг олон нийтийн сүлжээнд дор хаяж 15 удаа түгээсэн байна. Түүний X болон Truth Social хаягт 2025 оны дөрөвдүгээр сараас 2026 оны есдүгээр сарын хооронд нийтлэгдсэн эдгээр мэдээлэлд Fox News болон One America News сувгийн түүнийг “өмгөөлөгч” гэж нэрлэсэн гарчиг, нэвтрүүлгүүд багтжээ.
Кэти Захариа 2011 онд Pepperdine их сургуулийн Карузогийн хуулийн сургуулийг төгссөн боловч хуульчийн мэргэжлээр ажиллах эрх олгох шалгалтад тэнцсэн эсэх нь эргэлзээ дагуулж байв. The Wall Street Journal сонины мэдээллийг түүний байр суурийг мэддэг эх сурвалж баталснаар тэрээр тухайн жил Калифорнийн шалгалтад тэнцээгүй нь тодорхой болжээ. Захариа өөрийн мэргэжлийн ур чадварын талаар хэвлэлд тайлбарлахдаа хуулийн сургуулийн удирдлага болон бусад хүмүүстэй зөвлөлдсөн бөгөөд өөрийгөө “хуульч” гэж нэрлэж болох ч “өмгөөлөгч” эсвэл “Esquire” гэх нэршлийг хэрэглэхгүй байхыг зөвлөсөн гэж мэдэгджээ.
“Би хуульчийн зэрэгтэй бөгөөд олон улсын арилжааны эрх зүйн чиглэлээр туршлагатай учраас хууль эрх зүйн асуудалд дүн шинжилгээ хийж чадна. Гэхдээ энэ нь заавал хууль зүйн зөвлөгөө өгөх эрхтэй гэсэн үг биш” хэмээн тэрбээр Real America’s Voice сувгийн ярилцлагад орох үеэрээ тайлбарласан байна. Гэсэн хэдий ч тэр өөрийг нь “өмгөөлөгч” гэж тодорхойлсон хэвлэл мэдээллийн нийтлэлүүдийг олон нийтийн сүлжээнд давтан түгээж байжээ. Мөн аравдугаар сарын эхээр “The Greg Kelly Show” нэвтрүүлэгт оролцохдоо өөрийгөө “Би хуульч” хэмээн танилцуулсан байна.
Калифорни мужид хуульчийн эрхгүй хүн хуульчийн мэргэжлээр ажиллах, өөрийгөө эрх бүхий хуульч мэтээр танилцуулахтай холбоотой хуулийн хязгаарлалт үйлчилдэг. Калифорнийн Хуульчдын холбооноос Захариа тус мужид хуульчийн мэргэжлээр ажиллах эрх авсан бүртгэл байхгүй гэж CNN-д мэдэгджээ.
Захариа 2011 онд Хятадын Бээжин хот руу нүүж, Zhong Lun хуулийн фирмийн олон улсын практикийн багт ажилласан байна. Тэрээр олон сая ам.долларын хувьцаа эзэмшигчдийн хэлцэл дээр ажиллаж байсан бөгөөд шаардлагатай туршлага, ур чадвартай байсан гэж мэдэгджээ. Гэвч Хятадын хууль тогтоомжийн дагуу гадаадын иргэд тус улсын хуульчийн эрх олгох шалгалтад оролцох боломжгүй бөгөөд лицензтэй хуульчаар ажиллах эрхгүй байдаг.
Түүний мэргэжлийн үнэмлэх, эрхийн асуудал олон нийтийн анхааралд орсны дараа Campaign for Accountability хэмээх хяналтын байгууллага Калифорнийн Хуульчдын холбоонд хандаж, түүний мэргэжлийн эрхийн талаарх мэдэгдлүүдийг шалгах хүсэлт гаргажээ. Харин Цагаан ордны төлөөлөгч Захариаг Ерөнхийлөгчийн засаг захиргааны үйл ажиллагааг олон нийтэд тайлбарлахад шаардлагатай ур чадвартай хүн хэмээн өмгөөлсөн байна.
Л.Баяр
