Уул уурхайн яамнаас “Эрдэс баялгийн салбар 2025” олон нийтийн хэлэлцүүлгийг энэ сарын 15-нд буюу нөгөөдөр зохион байгуулах гэж байна. Иргэд, олон нийтэд уул уурхайн салбарын талаар бодит ойлголт өгөх, салбарын хөгжлийн хэтийн төлөв, бүтээмж, өрсөлдөх чадварыг дээшлүүлэх, түүнчлэн 2025 он хүртэлх зорилтоо тодорхойлох зорилготой.

Дээрх хэлэлцүүлгийн бэлтгэл ажлыг өнгөрсөн нэг сарын хугацаанд хийсэн байна. Ингэхдээ төмөр, алт, нүүрс, геологи, газрын тосны чиглэлээр салбар хэлэлцүүлэг зохион байгуулжээ. Энэхүү хэлэлцүүлэгт Уул уурхайн яам, харьяа агентлаг, мэргэжлийн холбоод, ТББ-ын төлөөлөл оролцсон. Дэд хэлэлцүүлгээс гарсан зөвлөмжийг “Эрдэс баялгийн салбар 2025” хэлэлцүүлгээс гарах уриалгад тусгах юм байна.

Хэлэлцүүлэг, “Эрдэс баялгийн салбараас Монгол Улсын нийгэм, эдийн засагт үзүүлж буй нөлөөлөл”, “Эрдэс баялгийн салбар ба хүний эрх, хүрээлэн буй орчин”, “Эрдэс баялгийн салбар ба олон нийтийн оролцоо, орон нутгийн хөгжил”, “Эрдэс баялгийн салбарын бүтээмж, өрсөлдөх чадвар” гэсэн дөрвөн салбар хуралдаантай аж. “Туушин” зочид буудалд болох энэхүү хэлэлцүүлэгт 300 орчим зочид төлөөлөгч оролцохоор бүртгүүлжээ.