Туркийн Истанбулын Ататюркийн нэрэмжит онгоцны буудалд гурван сар амьдарч байгаа монгол залуугийн талаарх мэдээлэл саяхан зарим мэдээллийн хэрэгслүүдэд гарсан. Түүнийг Түвдэнбаатарын Батгэрэл гэдэг бөгөөд өнгөрсөн 11 дүгээр сард гэртээ харих гэж яваад онгоцноосоо хоцорсноор нисэх буудал дахь амьдрал нь эхэлсэн гэж буй. Ийнхүү тэрбээр тийз авах мөнгөгүй дээрээс нь гар утсаа гээсэн тул хэнтэй ч холбоо барьж чадалгүй тус онгоцны буудалд зорчигчдын хөргийг зурж өгөн, хоолны мөнгөө олж байгаа аж.

Тэгвэл бид Т.Батгэрэлийн талаар холбогдох байгууллагаас нь тодруулахад тэрбээр 1964 онд төрсөн бөгөөд Улаанбаатарт гэр бүлгүй хүн аж. ГХЯ-ны Консулын газрын дарга Ш.Сүхбаатар энэ талаар “Т.Батгэрэлийн хувьд Монгол руу буцаж ирэх бодолгүй. Цааш Унгар явах хүсэлтэй хүн юм байна. Бид энэ залуугийн асуудлыг Турк дахь Монголын элчин сайдын яамаар дамжуулж шийднэ. Ер нь эх оронд нь авчрахаар ажиллаж байгаа” гэв.

Мөн Цагаан сарын баяр тохиож буй тул монголчууд БНХАУ-ын Эрээн хот руу зорчих нь харьцангүй ихэссэн байна. Тиймээс тус хот руу зорчигчид сэрэмжтэй байж биеэ зөв авч явахыг ГХЯ-аас анхаарууллаа.