Агаарын бохирдоыг бууруулах үндэсний хорооноос явуулж байсан автобусны хөдөлгүүр солих томоохон төслийг БНСУ-ын Daewoo компаниас цааш үргэлжлүүлэх боломжгүй болгожээ.

Улаанбаатар хотын замы хөдөлгөөнд эдүгээ 1500 гаруй том оврын автобус оролцдог бөгөөд энэ нь агаарын бохирдлын багагүй хувийг бүрдүүлдэг. Эх сурвалжийн мэдээлж буйгаар Агаарын бохирдлыг бууруулах үндэсний хороо Нийслэлийн нийтийн тээврийн газартай хамтран 2011 оноос том оврын автобусыг хосолмол хөдөлгүүрт шилжүүлэх ажлыг эхлүүлсэн юм. Энэ ажилд Автобус-1 120, Автобус3 компанийн 80 Цахилгаан тээвэр компанийн 50 гэх зэргээр нийт 400 гаруй автобусыг "монголчилж" хосолмол хөдөлгүүрт шилжүүлээд байжээ. 

Гэтэл БНСУ-ын Daewoo компаниас төслийн багт мэдэгдэл ирүүлж түүндээ "Монголчууд нийтийн тээврийн парк шинэчлэлээр Daewoo компаниас хосолмол хөдөлгүүртэй автобус авч болох байсан. Гэтэл дизель хөдөлгүүртэй  автобусуудыг онцолж авчихаад Daewoo компанийн эд ангийг өөрчилж /монголчилж/, зориулалтын бусаар хөдөлгүүр нэмж байна. Үүнээс шалтгаалж тэдгээр автобусууд осолдох дэлбэрэх аюулд хүрч болзошгүй тул хөтөлбөрөө зогсооно уу" гэжээ.

Агаарын бохирдлыг бууруулах үндэсний хорооноос явуулсан энэхүү төслийн тендерт Туртелком компани шалгарч төсвөөс 3,5 тэрбум төгрөгийг авсан юм.