Хог хаягдлыг ангилан, ил задгай хаяхгүй байлгахаар зориулалтын уутыг нийслэлийн есөн дүүргийн айл өрх, албан байгууллагуудад тараасан. Нэг сард 15 ширхгийг үнэ төлбөргүй олгох  хогны уутны зардлыг  хог хаягдлын үйлчилгээний хөлс болох 2500 төгрөгийн төлбөрт багтаан тооцож байгаа юм.

Уут нь ногоон өнгөтэй, , 80*45см-ийн хэмжээтэй, нүүрэн талдаа “Хоггүй Улаанбаатар-Азийн цагаан дагина”, “Хогоо бүү ил хаяарай”, “Хогоо зориулалтын уутанд хийж хуваарьт газраа байрлуулна уу” гэсэн бичигтэй. Ийм уутанд хогоо хийж ачуулаагүй тохиолдолд хогийг нь авахгүй гэж байгаа. Тэгвэл эл хогны уутыг бизнес болгон ашиглаж байгаа иргэд олширсоор байгаа юм.

Учир нь зарим иргэд улсаас үнэгүй тарааж байгаа хогны уутыг зах, дэлгүүрүүдээр явж борлуулж байгааг иргэд хэлж байна.


Сонгинохайрхан дүүргийн иргэн Б.Бямба: "Хогны уутыг зарим иргэд зарж, борлуулж байгаа. Улсаас үнэгүй өгч байгаа зүйлийг зарж болж байгаа юм уу гэж асуухад надад өгсөн зүйлийг би яаж ч ашигласан болно шүү дээ гэж байсан. Ширхэгийг нь 250-1000 төгрөгөөр Хархорин зах дээр зарж байсан. Мөн зарим нэг дэлгүүрүүдэд хогны уутыг борлуулж байгаа" гэв.



Сонгинохайрхан дүүргийн иргэн Д.Баян-Очир: Энэ уутанд хогоо хийж ачуулааагүй тохиолдолд хог авахгүй гэсэн. Гэтэл халуун үнс нурам хийж болохгүйн дээр нимгэн учир хүнд зүйл хийгээд л ёроол нь цоордог.  Ялангуяа гэр хорооллын айл өрхийн хувьд төрөл бүрийн л хог хаягдал гарна. Тэр болгоныг яаж нимгэхэн уутанд хийж болох вэ дээ. Энд тэндээсээ цоороод асгарчихна.