МЗХ-ны дэргэдэх “Залуучуудын Хөдөлмөрийн Төв Бирж”-ээс өнөөдөр 2014 онд хэрхэн ажиллах төлөвлөгөөгөө танилцууллаа. Тэд энэ онд “Хөдөлмөр зуучлалын нэгдсэн систем” болох www.myjob.mn сайтыг ашиглалтанд оруулж ажил олгогч байгууллага, ажил хайгчдын мэдээллийг нээлттэй ил тод болгож байгаа бөгөөд өнөөдрийн байдлаар тус сайтад 5732 ажил хайгч, 326 ажил олгогч, 350 нээлттэй ажлын байр бүртгэгдээд байгаа аж.
Энэ үеэр МЗХ-ны Ерөнхийлөгч А.Мөнхбат “Засгийн газар, Хөдөлмөрийн яам, манай холбоо хамтран хэрэгжүүлсэн Ажилтай орлоготой Монгол Залуу хөтөлбөрт 2014 онд 10.000 оюутан залуус хамрагдахаар болсонд баяртай байгаа. Ер нь энэ жил МЗХ залуучуудаа ажилтай орлоготой болгох, түүнчлэн бизнес эрхэлж буй залуусаа дэмжих, нөхцөл боломжоор хангах, хамтран нэгдэж бизнесийн орчинг сайжруулахад санал санаачлага гаргах зэргээр олон ажлуудыг хийхээр төлөвлөж байна. Мөн яг одоо гэртээ ажилгүй сууж байгаа залуучууд МЗХ дээр байрлах “Залуучуудын Хөдөлмөрийн Төв Бирж” дээр ирээд бүртгүүлээрэй. Манай ажлын сайтаар зочлоорой гэж хүсмээр байна" гэлээ.
