Дөнгөж сая ССАЖЯ-ны Соёл Урлагийн бодлогын хэрэгжилтийг зохицуулах газрын дарга Н.Оргил өөрийн хүсэлтээр ажлаа орхиж буйгаа сэтгүүлчдэд мэдээллээ. Тэрээр энэ тухай хэвлэлийн бага хурал хийж мэдэгдсэнээс гадна өөрийг нь гүтгэсэн худал мэдээллүүдэд няцаалт хийсэн юм.

Н.Оргил өөрийг гүтгэсэн мэдээллүүдийн тухайд “Өнгөрсөн онд болсон Улаанбаатар кино наадмаас хойш миний тухай худал гүтгэлэгийн шинжтэй мэдээллүүд гарч эхэлсэн. National Geographic-ийн нэг тэрбум 500 гаруй сая төгрөгийг идсэн, Улаанбаатар кино наадмыг зохион байгуулалтын мөнгөнөөс завшсан гэх мэдээллүүд сонин сайтуудаар их гарлаа. Дээрх мэдээллүүд эхэндээ гаднаас байсан бол сүүлдээ манай яаман дотор явж эхэллээ. Тиймээс би нэр төрөө сэргээхээр шийдэж энэ хэвлэлийн бага хурлыг хийж байгаа юм.

National Geographic-ийн хэрэгтэй би ямар ч холбоогүй. Тэр бол аялал жуулчлалын газартай холбогдох асуудал. Өчигдөр над руу National Geographic-ийн хуулийн асуудал хариуцсан хүн ярьсан. Тэд энэ талаар мэдээлэл хийж миний энэ хэрэгт хамаагүйг мэдэгдэхээс гадна өөрсдийн нэр төрийг сэргээнэ гэсэн. Харин Улаанбаатар кино наадмын хувьд бид кино наадмаа 250 сая төгрөгөөр хийе гэсэн ч чадалгүй, танаж танаж 150 саяд багтааж хийсэн. Би эндээс ямар ч мөнгө идээгүй. Миний гар цэвэр. Би тэр АТГ-д шалгуулахад бэлэн байна” гэсэн юм.

Түүнчлэн тэрээр ойрын хугацаанд өөрийн хүсэлтээр албан тушаалаа өгөх гэж байгаагаа мэдэгдсэн бөгөөд энэ талаар “Би өөрийн хүсэлтээр ажлаа өгч байгаа. Яагаад гэвэл цаашид ажиллах боломж нөхцөл бүрдэхгүй байна. Төрийн албыг төрлийн алба болгодог бүхэл бүтэн баг, механизм тэнд ажилладаг юм байна. Би гэдэг хүн энэ том асуудалтай ганцаараа үзэлцээд дийлэхгүй юм байна. Газрын дарга бол салбараа мэддэг хүн байх ёстой. Гэтэл Газрын даргын ажлыг хүчээр унагаадаг, ингэхдээ мэргэжлийн бус хүмүүс ажилд оруулж ирж байна. Ийм асуудалтай цаашид эвлэрч ажиллаж чадахгүй” гэсэн юм.

Төрлийн алба гэж хэлсэн нь тус яамны Төрийн нарийн бичгийн дарга П.Алтангэрэл болон түүний баруун гарын хүн, СБТГ-ын дарга П.Алтан-Од нар түүний санаачилсан Сумын төвийг кино театржуулах төслийг танил талаа ашиглан унагаасантай холбоотой аж. Тодруулбал дээрх төсөл 20 суманд хэрэгжиж кинотеатртай болоод байх үед тэд хоёр дахь удаагийн тендерийг мэргэжлийн бус хүмүүст өгсөн нь төслийг зогсонги байдалд оруулсан гэнэ.