“Сочи-2014” өвлийн олимпид оролцохоор манай улсаас хоёр тамирчин зорьсон. Хувцаснаасаа эхлээд л хөгтэй явсан тамирчид маань дахиад л хөглөсөөр яваа сурагтай. Өөрөөр хэлбэл, Сочигийн олимпийг зорьсон тамирчдын Цагаан сарын паянгууд олныг “хөшөөж” эхэллээ.

Тодруулбал, Олимпид оролцохоор зорьсон манай хоёр тамирчинтай сар шинийн баяраар Цанын холбооны Ерөнхийлөгч Р.Раш золгохоор зочилжээ. Энэ үеэр Р.Раш тамирчдад хэвийн боов авчирсан аж. Гэвч Сочид харуул хамгаалалт чанга учир хэвийн боовоо оруулахад багагүй хүндрэлтэй тулгарчээ. Тиймээс тэд  сар шинийн хэвийн боовоо жигнэмэг, печень мэтээр ойлгуулж оруулсан нь хөгтэй ч гэмээр юм уу хөгжилтэй байдлыг бий болгосон аж. Үүгээр зогсохгүй сар шинээ Сочид үдэх болсон манай тамирчид зүг мөрөө хэрхэн гаргахаа  мэдэхгүй сандарцгаасан сурагтай. Улмаар Оросуудаас зүг мөрөө хэрхэн гаргахаа асууж хөглөжээ.

Гэхдээ л энэ бүхнийг эс тооцвол тамирчид маань тэнд тав тухтай, сэтгэл хангалуун байгаа гэнэ.  Ямар ч утаагүй бас дулаахан, хоол унд нь боломжийн гээд л их л ам сайтай байгаа сурагтай.

Тэд бэлтгэлээ маш сайн базааж байгаа төдийгүй Австри улсын “Ramsu” баазад  хамтарсан бэлтгэлд орсон байна.  Яахав Олон улсын цанын холбооны гишүүн орноос эхний тавд орж чаддагүй ч манай улс олимпийн эрх авдаг орон гэдгээрээ байр суурь дээгүүр байдаг гэдгийг албаныхан онцоллоо.

Сочиг зорьсон тамирчдын хувцас нэлээн шүүмжлэлийг дагуулж байсныг та бүхэн санаж байгаа байх.Гэвч албаныхан дараа дараачийн удаа олимпийн монгол өнгийг бий болгоно гэсэн төлөвлөгөөтэй ажиллаж байгаа аж.

Харин тамирчдаа амжилттай оролцоод ирээсэй хэмээн хүлээж суугаа ард иргэд зарим зүйлд сэтгэл дундуур, санаа зовнисон байдалтай байгааг дурдах нь зүйтэй байх. Тухайлбал, тамирчдын даатгалын асуудал сул, мөн техник хэрэгслийн хувьд тийм ч хангалттай түвшинд биш  байгаа аж.

Гэвч олимпийн хотхондоо тухлаж, эх орныхоо төрийн далбаагаа мандуулж суугаа хоёр тамирчиндаа амжилт хүсэхээс өөр яалтай.  Хөгтэй, хөгжилтэй ч бэлтгэл сургуулилттаа амжилттай хийж яваа хоёр тамирчнаа “сайн мэдээ” сонсгохыг л хүлээж сууя даа.