Цагаан сараас өмнө тэтгэврийг 15-30 хувиар нэмсэн хэмээн Засгийн газраас мэдээлсэн. Тэгвэл тэтгэвэр 15 хувиар ч нэмэгдээгүй байна. Энэ талаар ахмадууд гомдоллож эхэллээ. Учир нь өргөн хэрэглээний бараа бүтээгдэхүүний үнэ нэмэгддэгтэй холбоотойгоор цалин тэтгэвэрийн нэмэгдлийг энэ жил урьдчилан зарлаагүй чимээгүй нэмсэн. Түүнчлэн энэ удаад тэтгэвэрийн зөрүүг арилгах үүднээс бага тэтгэвэртэй иргэдийнхийг арай илүү хувиар нэмсэн гэж байгаа. Тухайлбал 180 мянган төгрөгийн тэтгэвэр 206 мянган төгрөг болж өссөн хэмээн Засгийн газраас хэлж байгаа юм.

Тэгвэл үүнийг ахмадууд үгүйсгэж байна. Тухайлбал 449 мянган төгрөгийн тэтгэвэртэй хүний тэтгэврийг нэмэхдээ “Өндөр тэтгэвэртэй хүнийхийг нэмж болохгүй” гээд 22 мянган төгрөгөөр нэмсэн байна. Харин ахмадууд өөрсдийнх нь тэтгэврийг хэдэн хувиар нэмсэнийг холбогдох газраас тодруулахад “Хувь байхгүй. Цаанаасаа Засгийн газрын тогтоол гарсан” хэмээн хариулсан байна. 449 мянган төгрөгийн нэмэгдэл 22 мянган төгрөгөө хувилаад үзвэл 4 хувиар л нэмэгдсэн аж. Ер нь 300 мянга буюу түүнээс дээш төгрөгийн тэтгэвэртэй хүмүүсийн тэтгэврийг 20 мянган төгрөгөөр л нэмжээ. Уг нь хамгийн багадаа 18 хувиар нэмэх ёстой билээ.