Прокурорын байгууллага 2013 онд захиргааны зөрчлийн хэрэг бүртгэлт явуулсан 31440 материал хянаж, гэмт хэргийн талаарх 83781 гомдол, мэдээлэл,  эрүүгийн 37686 хэргийг хянаж, 6697 хэргийг шүүхэд шилжүүлж, 3685 хэргийг хялбаршуулсан журмаар шийдвэрлэж, шүүх хуралдаанд давхардсан тоогоор 8186 удаа оролцож, ял эдлүүлэх ажиллагаанд тавих хяналтын чиглэлээр 788 удаа шалгалт хийх зэргээр ажлын ачаалал ихтэй ажилласан байна.

Ажлын тайлангаас үзэхэд мөрдөн шалгах ажиллагаанд тавих хяналтын чиглэлээр хялбаршуулсан журмаар шалгасан болон шүүхэд шилжүүлсэн  хэрэг өссөн, байцаан шийтгэх ажиллагааны оролцоо, гэмт хэргийн улмаас учирсан хохирлын нөхөн төлүүлэлт нэмэгдсэн, мөрдөн байцаалтын ажиллагааны явцад бичсэн даалгавар өссөн, гэмт хэргийн бүрэлдэхүүнгүй үндэслэлээр хэрэгсэхгүй болгосон хэргийн тоо буурсан зэргээр хяналтын ажилд ахиц гарсны гадна прокурорын байгууллагын үйл ажиллагааг сурталчлан таниулах зорилгоор УЕПГ-ын вэб сайтад тавьсан мэдээ мэдээллийн тоо өнгөрсөн оныхоос 1,9 дахин өсч, сонинд 60, телевизэд 218 удаа мэдээ мэдээлэл гаргаж ажилласан байна.

Гэвч цаашид шүүхэд шилжүүлсэн хэрэг шүүхээс нэмэлт хэрэг бүртгэлт, мөрдөн байцаалтын ажиллагаа хийлгэхээр прокурорт буцах, хяналтын ажлын алдаанд тооцох болон прокурорын шийдвэр хүчингүй болох байдал буураагүй байна. Албан үүрэгт ажилдаа хариуцлагагүй хандаж, хяналтын ажлаа чанаргүй гүйцэтгэсэн прокуроруудад хариуцлага хүлээлгэж байгаа ч зөрчил буурахгүй, давтан гарч байгаад харьяа прокурорын газруудын удирдлагууд дүгнэлт хийж,  ажлын чанарыг сайжруулах шаардлагатай гэж дүгнэлээ.

Зөвлөлийн хуралдаанаас 2014 онд прокурор, ажилтнуудын дунд явуулах Үндэсний монгол бичгийн сургалтын түвшинг нэмэгдүүлэх, удирдах ажилтнуудыг хамруулж явуулах сургалтын хэлбэрийг өөрчилж, чанаржуулах, прокурорын байгууллагын гадаад харилцааны зорилго, чиглэлийг шинээр тодорхойлох, гэмт хэргээс урьдчилан сэргийлэх талаар иж бүрэн арга хэмжээ авч хэрэгжүүлэх, хийсэн ажлын тоо, чанарын үзүүлэлтэд дүн шинжилгээ хийж, цаашид авч хэрэгжүүлэх бодлого, зорилтоо тодорхойлох, прокурорын хяналтын чиглэлээр урьд нь гаргасан тушаал, шийдвэрүүдийн хэрэгжилтэнд тавих хяналтыг сайжруулах зэрэг тодорхой зорилтуудыг дэвшүүлж ажиллахаар тогтлоо.

 Хуралдаанаас Улсын Ерөнхий прокурорын 2011 оны 94 тоот тушаалаар батлагдсан журамд нэмэлт өөрчлөлт оруулах асуудлыг дахин хянаж үзэх, аймаг , нийслэл, дүүргийн прокурорын газрын бүтцийг шинэчлэн  тогтоох талаар Улсын Ерөнхий прокурорын тушаал гаргахаар шийдвэрлэлээ.