Архангай аймгийн хэмжээнд ерөнхий боловсролын дунд сургууль 29 байдаг ч аймгийн Засаг дарга Д.Бат-Эрдэнийн шийдвэрээр 11 захирал, сургалтын менежер  ажлаасаа халагджээ. Халаа сэлгээ 2013 оны нэгдүгээр сараас эхэлсэн бөгөөд одоо нэмж аймгийн төвийн гурван сургуулийн захирал чөлөөлөгдөх шийдвэрийг аймгийнхаа Засаг даргаас аваад байгаа аж.

Сургуулийн удирдлагуудыг ийн хоморголон халж буй талаар Архангай аймгийн Ерөнхий боловсролын сургуулийн захирлуудын холбооны тэргүүлэгч Ч.Цэцэгээ өчигдөр сэтгүүлчдэд мэдээлэл хийлээ. Тэрбээр, "Хууль бус халалтаа зогсоогоочээ. Ер нь ажлаас янз бүрийн үндэслэлүүд гаргаж ирж халж байна. Заримыг нь өөрсдөө сайн дураарай ажлаа өг, улс төрийн байдал ийм байна. Та ажлаа өгөхгүй бол шууд хална гэдэг" гэв.

Эдгээр хүмүүсийг ажлаас халсан шалтгаанаа сургалтын чанар муу байна гэсэн үндэслэлээр тайлбарладаг байна. Гэтэл нэг сургуулийн захирлыг халаад жил тойрч байхад түүнийг орлох хүний одоо болтол тавиагүй байгаа гэнэ. Тэгэхээр захиралгүй сургууль ямар дүрэм журмаар сургалтаа явуулж, сургалтын чанар нь ч яаж сайжрах вэ гэдэг эргэлзээтэй байгаа юм. Сүүлийн үед ихээхэн хэл амтай байгаа боловсролын салбарын асуудал бас нэгээр нэмэглээ.