Баянзүрх дүүргийн 9 дүгээр хорооны иргэн С.Чулуунбаатар хэвлэлийнхэнд ханджээ. Тэрээр өөрийн гэр бүлийг Н.Батдорж гэх хүнээс хамгаалж өгөхийг холбогдох мэргэжлийн байгууллагуудаас нь хүссэн юм. Ингээд түүний яриаг бүрэн эхээр нь хүргье.

-Миний охин 2006 онд Н.Батдорж гэдэг хүнтэй гэр бүл болсон юм. Гэхдээ одоо түүнийг хүргэнээ ч гэж хүлээн зөвшөөрөхөд хэцүү боллоо. Учир нь тэр хүн гэртээ тогтохгүй алга болдог мөртлөө охиныг минь байнга зодож нүдэн гэр бүлийг минь басамжлан доромжлох боллоо. Өмнө нь миний охинтой бас нэг хүн сууж яваад хүүхэдтэй болгочихоод хаячихсан юм. Дахин амьдрал зохиохдоо сайхан хүнтэй ханиллаа гэж бодсон бас л өөдгүй амьтан таарчээ. Ийм нэг азгүй заяатай охиноо бодохоор өрөвдөх юм. Уг нь Н.Батдоржийн хүүхдийг тээж төрүүлсэн юм одоо гурван ой өнгөрч байгаа. Харин том охин нь долоон настай. Н.Батдоржийн увайгүй үйлдлүүд хэрээс хэтэрч цөхрөлийг минь барж байна. Тэрээр одоо охиноос минь тусдаа байгаа ч үргэлж дарамталж, хардаж сэрдэнэ. Биднийг утсаа авахгүй болохоор долоон настай зээ охиныг минь хичээлдээ явах замд нь барьж аваад ээжийгээ хэнтэй юу хийж байгааг нь хэлэхгүй бол хөлийг чинь хугална гэж айлган сүрдүүлсэн байна лээ. Бид балчир охиноо харгис этгээдийн гарт алдчих вий гэхээс маш их айж байна. Цагдаа сэргийлэхэд тэмдэглүүлсэн байгаа ч нэг их ойшоож үзэхгүй байгаа. Н.Батдорж хоёр жилийн өмнө аав ээждээ золгоно гэж охиныг минь авч яваад гарынх нь судсыг ханаж орхисон байсан. Бид цагдаа сэргийлэх болж шүүхэд хандахад уурын мунхагаар ийм зүйл хийлээ уучлаач гэж гуйгаад байхаар нь гомдлоо буцааж авсан юм. Ер нь энэ хүн охиныг минь маш их зодож нүддэг байсан нь саяхнаас мэдэгдсэн. Охин маань зодуур амсан амьдарч байгаагаа тас нуугаад хэлдэггүй байж. Н.Батдорж өнгөрсөн онд охиноос минь салаад Турк явж тэндээ хэсэг хугацаанд ажиллаж амьдарсан юм. Тэр үед охиныг минь ирээч хамт амьдаръя, амьдралаа өөд татъя, дахиж чамд гар хүрэхгүй гэж гуйсаар байгаад татаж авсан. Гэтэл оны дараахан охиныг минь зодож нүдээд хөмсөгийг нь сэт цохичихсон байна лээ. Тэгээд охин маань тэнд амьдардаг монгол хүмүүсийг тусламжтайгаар гэртээ ирээд байна. Дахин тэр хүнийг харахыг ч хүсэхгүй байгаа гэсэн. Гэтэл өнөөх гайхал нь одоо араас нь ирчихээд дахиад л гуйж гувшин, эсвэл утсаар дарамтлах боллоо. Эхнэр минь тэр залууд анхнаасаа дургүй байсан болохоор ч тэр үү эхнэрийг нь элдвээр хараан зүхдэг байсан. Энэ хүнээс манай гэр бүлийг аварч хамгаалж өгөхийг мэргэжлийн байгууллагаас хүсэн гуйж байна.

БЗД-ийн иргэн С.Чулуунбаатар