Улсын Ерөнхий Прокурорын Газраас дэвшүүлсэн “Прокурорын байгууллагын үйл ажиллагааг олон нийтэд хүргэх, гэмт хэргээс урьдчилан сэргийлэх ажлыг эрчимжүүлэх” зорилтын хүрээнд Говь-Алтай аймгийн прокурорын газраас өчигдөр Прокурорын байгууллагын үйл ажиллагааг олон нийтэд сурталчлах , гэмт хэргээс урьдчилан сэргийлэх чиглэлээр төр, захиргааны байгууллагын хамтын ажиллагааг сайжруулах зорилгоор тус аймгийн төр захиргааны байгууллагын удирдлагууд оролцсон “Нээлттэй хаалганы өдөрлөг”-ийн арга хэмжээг зохион байгуулсан байна.Уг арга хэмжээнд Есөнбулаг сумын засаг дарга Ж.Ганбат, ЗДТГ-ын дарга Г.Ундармаа болон төр захиргааны 25 байгууллагын удирдлагууд оролцжээ.
Өдөрлөгийн үеэр аймгийн прокурор, Хууль цаазын итгэмжит зөвлөх Н.Ганбаатар аймгийн прокурорын газраас 2012, 2013 онд удирдлага зохион байгуулалт дотоод ажил, мөрдөн шалгах ажиллагаанд тавих хяналт, ял эдлүүлэх ажиллагаанд тавих хяналт, гэмт хэргээс урьдчилан сэргийлэх чиглэлээр хийсэн ажил, гарсан үр дүн, цаашид анхаарах асуудал, Прокурорын байгууллагын бүтэц зохион байгуулалт, чиг үүрэг, онцлог, Улсын Ерөнхий Прокурорын Газар болон аймгийн прокурорын газраас 2014 онд баримтлах бодлого, дэвшүүлсэн зорилт, гэмт хэргээс урьдчилан сэргийлэх чиглэлээр мөн онд хийгдэх ажлын талаар мэдээлэл хийж тэдгээрийн сонирхсон асуултанд хариулсан байна.Түүнчлэн цаашид төр захиргааны байгуулагуудтай хууль сурталчлах, сургалт зохион байгуулах, гэмт хэргээс урьдчилан сэргийлэх чиглэлээр хамтарч ажиллахаар шийдвэрлэжээ.
Д.Ундрах /24tsag.mn/
