Өнөөдөр МХЕГ-ын даргын үүргийг түр орлон гүйцэтгэгч Д.Батмөнх, Эрчим хүчний яамны Төрийн нарийн бичгийн дарга Д.Дэлгэрцогт нар уулзалт хийж санал солилцон, энэ онд хамтран ажиллах төлөвлөгөөнд гарын үсэг зурлаа. Уулзалтад МХЕГ-ын ДБХГ-ын дарга Д.Жаргал, эрчим хүчний хяналтын улсын ахлах байцаагч Б.Мөнхсайхан, Б.Батзориг нар болон Эрчим хүчний яамны Эрчим хүчний бодлогын хэрэгжилтийг зохицуулах газрын дарга Ц.Баярбаатар, түлш дулааны хэлтсийн дарга Т.Батдондог, хяналт шинжилгээ үнэлгээ, дотоодын аудитын газрын дарга Э.Алтангэрэл, ЭХБХЗГ-ын ахлах мэргэжилтэн Х.Авирмэд болон холбогдох бусад албаны хүмүүс оролцсон юм.

Талууд энэ онд хамтран Эрчим хүчний салбарын эрх зүйн орчинг боловсронгуй болгох, тэр дундаа Монгол Улсад шинээр нэвтэрч буй шинэ техник, тоноглол, тоног төхөөрөмж, материалын стандарт, шаардлагуудыг шинэчлэх, тодорхой болгох, Улаанбаатар хотын хувьд тулгамдаад буй цахилгаан, дулааны шугам сүлжээг хамгаалах дүрэм, журмыг шинэчлэж гаргах: Улсын төсөв болон, Чингис бонд, гадаад зээл тусламжийн хөрөнгөөр хэрэгжиж буй эрчим хүчний томоохон төсөл хөтөлбөрүүд болох Амгалан дулааны станц, ДЦС-3, 4 ХК-ийн өргөтгөл, 8 аймагт шинээр баригдах дулааны станцын зураг төсөл, угсралтын байдалд урьдчилсан зөвлөмж боловсруулах, хамтарсан хяналт шалгалт хийхээр боллоо.
Д.Батмөнх 2014 онд хэрэгжиж буй төсөл хөтөлбөрүүдэд яамнаас тавьж буй захиалагчийн хяналтыг сайжруулах, гүйцэтгэгч байгууллагуудын ажлын чанарыг дээшлүүлэх, Мэргэжлийн хяналтын байгууллагаас хяналт шалгалт хийж, албан ёсоор тавьсан асуудлуудыг цаг тухай бүрт нь яаралтай хамтран шийдвэрлэж байхыг хүссэн юм. Мөн одоо ажиллаж байгаа дулааны цахилгаан станцуудын шугам сүлжээ, тоног төхөөрөмжийн ашиглалтын төлөв байдал, насжилт, аюулгүй ажиллагаанд хяналт шалгалт хийж эрчим хүчний аюулгүй байдлыг Улсын хэмжээнд хангуулахад онцгойлон анхаарахыг шаардлагатайг хэлж, цаашдын харилцаа хамтын ажиллагаанд амжилт хүслээ