Ирэх даваа гарагт “Иргэдийн шударга шүүх” ТББ-аас Монгол Улсын хүний эрхийг хамгаалах бодлогын бичиг баримтын талаар хэлэлцүүлэг зохион байгуулах аж. Хэлэлцүүлэг Иргэний танхимд болох бөгөөд энэ үеэр иргэний эрх нь зөрчигдсөн иргэдийн эрхийг сэргээх ажлыг эрчимжүүлэхийг шаардах аж. “Иргэдийн шударга шүүх” ТББ-ын тэргүүн Х.Бат-Ялалт хэлэхдээ "Улсын хэмжээнд олон тооны хөтөлбөр хэрэгждэг. Миний боловсруулсан хөтөлбөрийг бодлого гэдэг талаас хараасай гэж хүсч байна. Манай улсад төдийгүй бусад улсад ч  хүний эрхийг хамгаалах асуудлыг "тунхаглал" төдий үздэг. Хүн амьд явах эрхтэй, эрүүл аюулгүй орчинд амьдрах эрхтэй гэсэн ч үнэндээ  эрүүл аюулгүй орчин байна уу гэдэг нь эргэлзээтэй. Гэтэл хангах эрх нь төрд байдаг. Манай улсад 2003 онд УИХ-ын 41 дүгээр тогтоолын хавсралтаар Хүний эрхийг хамгаалах хөтөлбрийг баталсан. Харамсалтай нь хүний эрхийг хамгаалах, хангах хоёроо нэг ойлголт болгоод, холиод системгүй болгочихсон. Өнөөгийн холбогдох албан тушаалтнууд нь энэ хөтөлбөрийнхөө талаар ямар ч ойлголтгүй сууж байна. Энэ мэтээр төрийн залгамж чанар байхгүйгээс болж хөтөлбөрийн ололттой талыг орхигдуулсан" гэв.