Баян-Өлгий аймгийн нутагт, Алтай богд ууланд авиралт хийн, буух үедээ осолдож, амь насаа алдсан уулын спортын ОУХМ, Гавьяат тамирчин Л.Болдбаатар харамсалтайгаар амиа алдсан билээ.

Тэгвэл энэ хэрэг явдалтай холбогдуулан Монголын уулын спортын холбооноос ирэх даваа гаригт буюу хоёрдугаар сарын 24-ний 11.00 цагаас Спортын төв ордны хурлын зааланд талийгаач Л.Болдбаатарын осолдсон шалтгааны талаар мэдээлэл өгөхөөр хэвлэлийн хурал зарлаад байна.

Мөн үүнтэй холбогдуулан Монголын уулчдын үндэсний холбоо  мэдэгдэл гаргасан байна. Мэдэгдэлд:

-"Монгол Улсын Гавъяат Тамирчин, Уулын спортын Олон Улсын Хэмжээний мастер Лувсандашийн Болдбаатар агсныг Малчин ууланд осолд орж, олон хоног эрэн хайх хүнд өдрүүдэд сэтгэл зүрхээрээ үргэлж бидэнтэй хамт байсан, эмгэнэл илэрхийлсэн  хувь хүмүүс, ТББ -ын гишүүд, мэдээг уншиж бусдад түгээсэн хэвлэлийнхэн болон сайхан сэтгэлт ард түмэндээ туйлын их баярлалаа.

Талийгаачийн цогцсыг эрж, олох ажилд оролцсон Баян-Өлгий аймгийн Онцгой байдлын хэлтэс, Зэвсэгт хүчин, Хил хамгаалах албаны бие бүрэлдэхүүний өмнө Монголын бүх уулчид, аялагчдын өмнөөс мэхийн ёсолж байна. Ялангуяа Хил хамгаалах албаны Баян-Өлгий аймаг дахь дугаар ангийн Тусгай томилгоот бүлгийн албан хаагчдад тусгайд нь онцлон талархал илэрхийлж байна. Мөн ОУХМ, уулчин Х.Агваанданзан, А. Жанарбек, Ж.Баасанжав нарт Монголын уулын үндэсний холбооны зүгээс гүн талархал илэрхийлье. Талийгаачийг өчигдөр /II.21/ хотод авч ирсэн тул түүний ар гэр, төрөл төрөгсдөд эмгэнэл илэрхийлэх, хандив өргөх үйл ажиллагааг эхлүүлээд байна" гэжээ.