Байгаль орчны салбарын амин чухал цэг нь байгаль орчны хууль тогтоомжийн хэрэгжилтийг хангуулах асуудал байдаг. Тиймээс өнөөдөр Байгаль орчин ногоон хөгжлийн яам, Мэргэжлийн хяналтын ерөнхий газар 2014 онд хамтран ажиллах санамж бичгийг үзэглэлээ.

Мэргэжлийн хяналтын газарт тодорхой хэмжээний өөрчлөлт орж байгалийн нөөц, баялагын хяналт нь БОНХЯ-д ирэх, орчны хяналтын асуудал мэргэжлийн хяналтын байгууллагад үлдэх төлөвтэй байгаа. Тэгэхээр бодлого хэрэгжилт хоёр уялдахаас өөр аргагүй. Өмнө нь байгаль орчны хяналтыг яам нь мэргэжлийн хяналт мэднэ гэдэг харин мэргэжлийн хяналт нь бодлоготой уялдах тал дээр бага зэрэг алдаа байсан. Тиймээс энэ жил хамтарсан шалгалт хийж бодлогоо тодорхойлж нэгдсэн төлөвлөгөө гаргаж ажиллана гэдгээ БОНХЯ-ны төрийн нарийн бичгийн дарга Ж.Батболд хэлэв.

Өнөөдрийн хувьд зөвхөн гэрээ үзэглээд зогсохгүй 2013 оны  хамтарсан ажлаа дүгнэсэн нь онцлог байв. 2013 онд долоон ажил хийхээр төлөвлөснөөс тав нь биелж хоёрынх нь  гүйцэтгэл хангагдаад явж байна. 2013 онд Мэргэжлийн хяналтын байгууллага нь Говийн их дархан цаазат газар хар ус нуурын болон Мянган угалзатын нурууны тусгай хамгаалалтын газрын хамгаалалтын захиргаанд хуулийн хэрэгжилт хэрхэн хангуулж байгаад хяналт шалгалт хийсэн. Мөн байгаль хамгаалах чиглэлээр үйл ажиллагаа явуулдаг төрийн бус байгууллагуудад мэргэжилтэн, улсын байцаагч хийх эрхтэй хүмүүсийг сургаж дадлагажуулах ажлыг БОНХЯ-тай хамтран зохион байгуулсан зэрэг байгаль орчны салбарт ахиц дэвшил авчирсан хэд хэдэн ажлыг дурдаж болно.