"Шилдэг" гэх цол гуншинтай Оросын “Зөн билгийн тулаан” нэвтрүүлгийн оролцогчид Монголыг зорих цуваа тасрахгүй нь. Дахиад л ирсэн сурагтай. Бүр сард нэг ирдэг болж. Өнгөрсөн сард Дмитрий Волхов гэгч ирсэн бол энэ удаа 2011 онд ирж байсан Мохсен Норузи гэх Иран эр иржээ.

Түүнийг урьж авчрах ажлыг Монголын зөн билгийн академи зохион байгуулж байгаа бөгөөд тэрээр уржигдар Монголд газардсан байна.  Өмнөх зөн билэгчдийн нэгэн адил тэрээр нийтийн дунд лекц уншиж, VIP уулзалт хийх гэнэ.

Үүнийхээ хажуугаар хамгийн ашигтай бас хамгийн нууцлагдмал үйлчилгээгээ хийнэ. “Үзэж харах” үнэ ханшийг сонсоод би бүр чихэндээ ч итгэсэнгүй. Ганцаараа 30 минут уулзахад 3000 ам.доллар, гэр бүлийн 2-3 хүн нэг цаг үзүүлж харуулаад заслаа хийлгэхэд 5000 ам.доллар аж. Үүгээр ч зогсохгүй түүний лекцийн тасалбар 30 мянга, VIP уулзалт нь 300 мянган төгрөг.

“ГЭНЭТ БАЯЖИХ”-аар шийдсэн Мохсен Норузи гэгчийн ид шидийг дурьдвал амьтантай ярьдаг, хүний бодол санааг уншдаг, анагаах эрдмийг “Төгс” эзэмшсэн нэгэн гэнэ. Ер нь хэн түүнийг амьтантай ярьдаг гээд нотолчихоо вэ? Амьтан уу, эсвэл өөрөө юу? За яахав зохиочих ид шид олдоогүй л юм байлгүй гээд дуугүй өнгөрье гэтэл анагаах эрдмийг "ТӨГС" эзэмшсэн юм байх. Тэр бүх өвчнийг анагаадаг юм бол эмнэлэг гэж байгаад хэрэг байна уу? Яршиг улсын мөнгийг эмнэлэгт үрж байхаар бүгдийг нь энэ эрд өгөөд хэлгүй, дүлий, сохор хорт хавдартай, ДОХ-той гээд л бүх төрлийн өвчтэй хүмүүс түүгээр эмчлүүлэг л дээ.

Нөгөөтэйгүүр энэ бүхэнд итгэдэг, мухар сүсэгтэй хүмүүс Монголоор дүүрэн. Зөн билэгч бөө лам хард итгэхээс биш эмчийг хүн гэж бодохоо больсон. Ямар сайндаа л зүрх судасны мэс заслын эмч, анагаах ухааны доктор Б.Болдсайхан нэгэнтээ "10 цаг хүнд хагалгаа хийчихээд чичирч салгалсан амьтан гараад ирэхэд ар гэрийнхэн нь "баярлалаа" гэхийн оронд "Тэр бөө үнэн хэлжээ" гэсэн хэмээн гомдоллож байхав.

Түүнчлэн "үзэж харах" үнэ хөлс нь хэдэн мянган доллараар яригдаж байхыг бодоход жирийн хүмүүст зориулагдаагүй нь ойлгомжтой. Баячуудыг онилсон энэ бизнесийг "Зөн билгийн академи" тэргүүтэй хэд хэдэн ТББ-ууд хийдэг.  Угаас Оросын “Зөн билгийн тулаан” гэж хөдөө тосгодын хүмүүст зориулж хийсэн тавилттай шоу манайхны мухар сүсгийг бэлдээд өгчихсөн бөгөөд түүнийг нь дээрх байгууллагууд сурамгай ашиглаж хэтэвчээ түнтийлгээд авч байгаа юм. Харамсалтай нь үүнийг монголчууд мэдсэн ч мэдээгүй юм шиг царайлж, зөн билэгч нэртэй шоуны баатруудыг ээлж дараагаар нь авчирч хөл алдан хамгаа барьсаар л.