Монголын Залуучуудын Холбоо өнгөрсөн оноос гадаад харилцаагаа өргөтгөх, дэлхийн болон бүс нутгийн хэмжээнд улс орнуудын залуучуудын байгууллагуудтай хамтын ажиллагаагаа өргөжүүлэх тал дээр анхаарч ажиллаж байгаа бөгөөд энэ  сарын 25-ны өдөр МЗХ-ны төлөөлөл Монгол улсад суугаа БНКУ-ын ЭСЯ-ны 1-р нарийн бичгийн дарга Ж.Т.Калибековтой уулзсан юм.

Уулзалтын үеэр Ж.Т.Калибековт МЗХ-ны үйл ажиллагааны ерөнхий чиглэл, 2014 онд хэрэгжүүлэх төлөвлөгөөнийхөө талаар товч танилцуулан БНКУ-ын ЭСЯ-тай хоёр орны залуучуудыг холбох, нөхөрлүүлэх, солилцооны хөтөлбөр хэрэгжүүлэх боломжуудыг нээх хүсэлтэй байгаагаа илэрхийллээ. 1-р нарийн бичгийн даргын зүгээс МЗХ-ны төлөөлөл ЭСЯ-ны урилгыг хүлээн аван ирсэнд талархаж байгаагаа илэрхийлээд манай хоёр орны түүх, соёл уламжлалд ижил төстэй зүйлс олон байгаа нь хамтын ажиллагааг эхлүүлэх, улам өргөжин амжилттай явагдах үндэс болно гэдгийг онцлон тэмдэглэсэн байна. Казакстан улс нь сүүлийн  20 жилийн туршид тууштай хөгжиж буй залуу улс юм.

Манай орны залуучууд тухайн орны бүтээн байгуулалтад гар бие оролцдог бөгөөд Казакстан улсад Баян-Өлгий аймгаас 100 гаруй оюутан хоёр улсын Боловсролын Яамдын хооронд байгуулсан гэрээний дагуу суралцаж, жил бүр 5 магистрант, докторантурт суралцах эрхийг авдаг юм байна. Ж.Т.Калибеков цааш нь хэлэхдээ Монгол улсын залуучуудын төв байгууллага болох МЗХ-той цаашид холбоотой ажиллаж, Казакстаны залуучуудын байгууллагатай холбож өгөхөө амлаад энэ удаагийн уулзалт үр дүнтэй болсныг онцоллоо.