Төрийн тусгай албан хаагчдын нэгдсэн эмнэлгийн зориулалтаар баригдсан барилгад байгаа оношлогооны MRI, компьютер томографийн аппаратыг Хавдар судлалын үндэсний төв рүү шилжүүлэхээр болжээ.

3.3 тэрбум гаруй төгрөгөөр суурилуулсан эдгээр тоног төхөөрөмжийг шилжүүлэхтэй холбогдуулан ЭМЯ, ХЗЯ болон Хавдар судлалын үндэсний төв, тоног төхөөрөмж нийлүүлэгч “Пролианс” компанийн төлөөлөл оролцсон ажлын хэсэг байгуулсан байна.

Нийлүүлэгч компанийн гүйцэтгэх захирал Б.Түмэнцогт энэ талаар "Эхний ээлжинд СТ төхөөрөмжийг шилжүүлнэ. Гуравдугаар сардаа багтаад шилжүүлэх үүрэг өгсөн. Харин МRI аппаратны хувьд түүнийг суурилуулахад дэд бүтцийг нь сайтар шийдэж өгөх хэрэгтэй байдаг. Одоогоор уг төхөөрөмжийг суурилуулах өрөө тасалгаа нь бэлэн болоогүй байна. Өрөө бэлэн болмогц шилжүүлнэ. Мөн СТ төхөөрөмжийг шилжүүлэхдээ Хятадаас мэргэжлийн инженерүүд авчирна. Тээвэрлэх зардлыг хараахан тогтоогоогүй байна" гэжээ.

Ийнхүү Хууль зүйн сайд Х.Тэмүүжин санасандаа хүрч тус эмнэлэгийн барилгад Тагнуулын ерөнхий газрыг оруулах нь тодорхой болсон бололтой.