Улсын Ерөнхий Прокурорын дэргэдэх зөвлөлийн хуралдаан өнөөдөр боллоо.Зөвлөлийн хуралдаанаар УЕПГ-ын дэргэдэх “Прокурорын сургалт судалгааны төв”- ийн дүрмийн төсөл, “Прокурорын сургалт судалгааны төв”-өөс явуулах “Медиа сургалт“ буюу видео сургалтын хөтөлбөрийн төслийн талаар Улсын Ерөнхий Прокурорын туслах, Сургалт судалгааны төвийн захирал Л.Болдын танилцуулга, “Гэмт хэргийн тухай хууль” , “Зөрчлийн тухай хууль“- ийн төслүүдэд харьяа прокурорын газруудаас ирүүлсэн саналыг нэгтгэсэн тухай УЕПГ-ын Мэдээллийн технологи, дүн шинжилгээний албаны дарга Д.Булганцэцэгийн мэдээлэл зэрэг асуудлыг хэлэлцлээ.
УЕПГ-ын дэргэдэх “Прокурорын сургалт судалгааны төв” нь дүрмийн төсөлд тус төв ажлаа Улсын Ерөнхий Прокурор, Улсын Ерөнхий Прокурорын дэргэдэх зөвлөлд танилцуулж байх, Сургалт судалгааны төвийн зардлыг УЕПГ-ын төсөвт тусгаж оруулах, Сургалт судалгааны төвийн прокурор ажилтнуудыг томилж чөлөөлөх талаарх саналаа төвийн захирал Улсын Ерөнхий Прокурорт танилцуулж шийдвэрлэдэг байх, төвд ажиллах сургагч багш нарыг сонгон шалгаруулах журам боловсруулж гаргах, Сургалт судалгааны төв нь өөрийн таних тэмдэг логотой байх зэрэг асуудлыг тусгасан байна. Зөвлөлийн хуралдаанаар “Прокурорын сургалт судалгааны төв”-ийн дүрмийн төслийг хэлэлцээд зарчмын хувьд дэмжиж эцэслэн боловсруулж гаргахаар тогтлоо.
“Прокурорын сургалт судалгааны төв”-өөс хэрэгжүүлэх “Медиа сургалт”-ын хөтөлбөрийг дэмжиж улмаар хөтөлбөрийг хэрэгжүүлэхэд шаардагдах төсөв зардлыг тооцон гаргаж, танилцуулж шийдвэрлэхийг “Прокурорын сургалт судалгааны төв”- ийн захирал Л.Болдод даалгалаа.
Зөвлөлийн хуралдаанаар “Гэмт хэргийн тухай хууль”, “Зөрчлийн тухай хууль”-ийн төслийн талаар харьяа прокурорын газруудаас ирүүлсэн саналуудыг нэг бүрчлэн хэлэлцэж, хуулийн төслүүдэд нэмж оруулах болон хасах шаардлагатай гэсэн саналуудыг тусгайлан нэгтгэж үндэслэл шалтгааныг тодорхой болгох талаар үүрэг даалгавар өгөгдлөө.
