Бараа бүтээгдэхүүн, ажил үйлчилгээний үнэ тариф өсч, иргэдийн цалин, тэтгэвэр, тэтгэмжийн бодит худалдан авах чадвар дордож байна хэмээн МҮЭ-ийн холбооноос мэдэгдэж байгаа. Тиймээс тус байгууллаас “Хөдөлмөр нийгмийн зөвшлийн Үндэсний гурван талт хороо”-г яаралтай хуралдуулах саналыг Засгийн газарт удаа дараа хүргүүлсэн боловч шалтгаангүйгээр хойшлогдсоор байсан юм.

Тэгвэл тэд өнөөдөр дээрх шаардлагыг дахин тавьсаны дагуу Хөдөлмөрийн яаманд талууд хуралдсан байна. Хурлаар боловсрол, эрүүл мэнд, шинжлэх ухаан, соёл урлагийн салбарт ажиллагчдын цалинг эхний ээлжинд нэмэгдүүлэх асуудлаар санал нэгджээ. Ингэснээр энэ долоо хоногт хуралдах Засгийн газрын хуралдаанаар уг асуудлыг хэлэлцүүлж батлуулах аж. Харин нийгэмд тулгамдаад байгаа хөдөлмөр нийгмийн тулсамдсан бусад асуудлуудыг энэ тав дах өдөр Үндэсний хорооны хурлыг дахин хуралдуулж хэлэлцэн шийдвэрлэхээр болжээ.