Говь-Алтай аймгийн нутагт Эрдэнэ, Алтай суманд байрлах Талын мэлтэс, Хатан суудал зэрэг газруудыг их дархан цаазат газруудын хамгаалалтын бүсээс нь гаргах саналыг Засгийн газрын хэрэг эрхлэх газрын дарга Ч.Сайханбилэг тус аймгийн өмнөх засаг даргаар ажиллаж байсан Ш.Амгаланбаярт өнгөрсөн оны есдүгээр сард хүргүүлсэн билээ.

Харин тухайн үед Ш.Амгаланбаяр болон Эрдэнэ сумын Засаг дарга нар тус газрыг ашиглах боломжгүй гэсэн хариуг Ч.Сайханбилэгт явуулсан байдаг. Учир нь Говийн их дархан цаазат газрыг ашиглах эсэхийг тухайн орон нутгийн удирдлага мэддэг хэмээн хуульд заасан байдаг аж. Тиймээс Говь-Алтай аймгийн засаг даргаас санал авсан тэр юм. Харин саяхан Говь-алтай аймагт болсон орон нутгийн ээлжит сонгуульд АН ялалт байгуулж өөрийн намын хүн засаг даргаар нь сонгогдсон учраас дээрх хоёр газрыг ашиглах эсэхэд АН санаа зовохооргүй болжээ. Учир нь өөрийн намаас сонгогдсон хүн тус газруудыг үг, дуугүй ашиглахыг зөвшөөрнө.

Үүнийг баталж буй мэт Говь-Алтай аймгийн Засаг дарга О.Амгаланбаатар нь Алтай сумын засаг дарга Ш.Баяржаргалыг ажлаас нь чөлөөлөх захирамж гаргажээ.

Сумын ард иргэд үүний цаана ЗГХЭГ-ын дарга Ч.Сайханбилэг тэргүүтэй дархан цаазат газрын алтанд шунагсад ийнхүү нутаг орныг нь сүйтгэх санаагаа биелүүлж байна гэж үзэж аж.