Үндэсний агаарын тээвэрлэгч “Хүннү Эйр” компани энэ оны зургадугаар сарын 9-нөөс Улаанбаатар-Парис-Улаанбаатар чиглэлийн нислэг үйлдэх болов.Энэ талаар өнөөдөр БНФУ-аас Монгол Улсад суугаа онц бөгөөд бүрэн эрхт элчин сайл Ив.Дэнулэ болон “Хүннү Эйр” компанийн удирдлагууд мэдээлэл хийлээ.
“Хүннү Эйр” компанийн Гүйцэтгэх захирал Б.Баяр, "Энэ оны зургадугаар сарын 9-нөөс долоо хоногт 2 удаагийн давтамжтайгаар нислэг үйлдэх болсон. Уг нислэгийг 120 хүний суудалтай “Аэробус А319” онгоцоор нислэг үйлдэнэ. Бид 2015 оноос уг нислэгийг сайжруулан “Аэробус А330” онгоцоор дундын зогсолтгүйгээр шууд нислэг үйлдэхээр төлөвлөж байна. Ингэснээр Монголын жуулчид зөвхөн Франц бус Баруун европ, Хойд Америк, Африк руу аялах боломжийг нээнэ” гэлээ.
Уг нислэг нь Улаанбаатараас 07.00 цагт нисч Парис хотод 14.30 цагт бууна. Буцах нислэг бол Парисаас 14.30 цагт хөөрч Улаанбаатар хотод өглөөний 07.00 цагт буух аж. Мөн замдаа ОХУ-ын Перм болон Екатринбург хотын аль нэгэнд нь 20-40 минутын түр зогсолт хийж шатахуунаа сэлбэх юм. Энэ бол цаг хугацааг 5-24 цагаар хэмнэж байгаа аж. Уг нислэгийг 6 дугаар сарын 9-нөөс 9 дүгээр сарын 5-ны хооронд тогтмол үйлдэх аж. Харин намар, өвлийн улирлаас шалтгаалан нислэгийг хэрхэн үргэлжлүүлэх талаар хэлэлцэх аж. Билетийн захиалгаа авч эхэлсэн. Тарифын хувьд Улаанбаатарааас нэг талын нислэг нь 1 сая 366 мянга 700 төгрөг байх бөгөөд 2 талдаа тиз авахад 2 сая 290 мянга 300 төгрөг байх аж. Харин Парисаас Улаанбаатар хүртэл нэг талдаа 692 евро, хоёр талдаа 1070 евро болох юм.
