Баян-Өлгий аймгийн прокурорын газраас 2014 онд хийсэн ажлын тойм болон тухайн онд гарсан гэмт хэргийн шалтгаан нөхцөлийн талаар Өлгий, Цэнгэл, Улаанхус сум Цагааннуур тосгон, Улаанбайшинтад очиж ард иргэдтэй уулзалт зохион байгуулжээ.

Энэхүү уулзалтаар прокурорын байгууллагаас өнгөрсөн онд шийдвэрлэсэн эрүүгийн хэргийн нөхцөл байдалд хийсэн дүн шинжилгээгээр тус аймагт хамгийн их гарч байгаа хуурамч баримт бичиг үйлдэх, албан тушаалтан өмч хөрөнгө завших үрэгдүүлэх гэмт хэрэг болон хамгийн их санаа зовоосон буюу анхаарал татсан хэрэг болох бусдын бие, эрх чөлөөнд халдах гэмт хэргийн шалтгааны талаар иргэдэд дэлгэрэнгүй мэдээлэл өгч харилцан санал солилцсон байна. Тус аймагт хамгийн их гарч байгаа хэрэг болох зодооны хэрэг жил ирэх бүр буурахгүй байгаа бөгөөд ихэнхдээ гэр бүлийн хүрээнд ахуйн шинжтэй маргааны улмаас гарч байна. Мөн голдуу согтуугаар үйлдэгдэж байгаа юм байна.

Өнгөрсөн онд тус аймагт гарсан нийт хэргийн 50 орчим хувийг Өлгий суманд гарсан гэмт хэрэг эзэлжээ. Өлгий суманд гарсан хэргийн дийлэнх нь гэр бүлийн дунд, төрсөн ах дүү нарын хооронд, айл хөршүүдийн хоорондын таарамжгүй харьцаанаас үүдэлтэй байна.

Ийм учраас гэр бүлээ, эхнэр нөхрөө хүндлэх, бие биенээ уучлах, ах дүү, төрөл саднаа хүнлэн дээдлэх, айл хөршөө хүнлэх зэрэг казах урианхайн ард түмний уламжлалт зан заншлаа сэргээхэд чиглэсэн арга хэмжээг баг, сумын захиргаа, хүүхэд залуучуудын болон эмэгтэйчүүд, ахмадын байгууллага хамтран тодорхой үр өгөөжтэй байдлаар зохион байгуулах шаардлагатай гэж үзжээ.