Буриад үндэсний өв уламжлал зан заншилыг хадгалан үлдээх зорилготой "Алтаргана" наадам ирэх долдугаар сарын 25, 26-нд болохоор товоо зарлаад буй.

Хоёр жилд нэг удаа болдог тус наадмыг одоогоор хаана зохион байгуулах нь тодорхойгүй байгаа ч хэдэн төрлөөр явуулахаа шийджээ. Тодруулбал саяхан болсон наадмыг зохион байгуулах соёлын дэд хорооны хурлаар “Алтаргана” наадмыг 12 төрлөөр  явуулахаар хэлэлцсэн байна.

Үүнд “Буриадын нэг өдөр” сэдэвт ардын аман зохиол, язгуур урлагийн хамтлагуудын уралдаан, Үлгэрч туульч, ерөөлч магтаалчдын уралдаан, Буриад ардын дуу дуулаачдын уралдаан, Орчин үеийн буриад дууны бүтээлийн уралдаан, Буриадын уламжлалт гар урлаачдын бүтээлийн үзэсгэлэн, “Дангина” гоо бүсгүйн тэмцээн, Буриад яруу найргийн уралдаан, Буриад хувцасны шилмэл загвар зохион бүтээгчдийн уралдаан, “Алтаргана” фото үзэсгэлэн, Буриад бөхийн барилдаан, Буриад сурын харваа, Хурдан морины уралдаан гэсэн төрлөөр зохион байгуулахаар эхний удаад санал солилцоод байгаа аж.