Монголдоо хиймэл дагуул бүтээх зорилготой "Сансар дахь Бидний Мөрөөдөл" төслийн нээлтийн ажиллагаа энэ сарын 20-нд Kempinski зочид буудлын ёслолын танхимд болох гэж байна.

Нээлтийн ажиллагаанд олон улсын мэргэжилтнүүд оролцож хиймэл дагуулын чиг хандлага болон энэхүү төслийг хэр бодитой хэрэгжих талаар танилцуулга, тайлбар хийх аж.

"Сансар дахь бидний мөрөөдөл" төсөл нь  “Залуу зохион бүтээгч”,  “Робокон” зэрэг танин мэдэхүйн уралдаант тэмцээний нэгэн адилаар дөрвөн үе шаттай реалити нэвтрүүлэгээр дамжин хэрэгжих юм.

Ингэхдээ эхний гурван шатанд оролцогчдын хиймэл дагуулаа хэрхэн хийх санаануудыг уралдуулах ба мэргэжлийн хүмүүс шүүн хамгийн боломжит хувилбаруудыг дараагийн шатанд үлдээнэ. Улмаар ирэх долдугаар сард эцсийн шатанд тунаж үлдсэн гурван баг хиймэл дагуулаа бүтээж эхлэх бөгөөд тэдгээр хиймэл дагуулуудыг энэ оны 12 дугаар сараас олон нийтийн хүртээл болох аж.

Уралдаанд бага дунд ахлах ангийн сурагчид, их дээд сургууль коллежийн оюутнууд насны хязгаарлалтгүйгээр оролцож боломжтой.