Баянхонгор аймгийн Прокурорын газраас үйл ажиллагаагаа олон нийтэд хүргэх, гэмт хэргээс урьдчилан сэргийлэх ажилд сум, орон нутгийн удирдлага, аж ахуйн нэгж байгууллага, иргэд нэг бүрийн оролцоог нэмэгдүүлэхэд анхаарч аймгийн Гэмт хэргээс урьдчилан сэргийлэх ажлыг зохицуулах зөвлөлийн гишүүдтэй хамтран ажлын хэсэг байгуулж  Баянхонгор аймгийн хөдөөгийн 19 сумдад хүрч ажиллалаа.

Ажлын хэсэг сумдад ажиллахдаа сум, орон нутгийн удирдлага, иргэдэд Шүүх эрх мэдлийн шинэтгэлийн хөтөлбөрийн хүрээнд 2013 онд Улсын Их хурлаас батлагдан гарсан шүүхийн тухай багц хуулиуд, Гэмт хэргээс урьдчилан сэргийлэх тухай хууль, орон нутгийн хуулийн болон хууль сахиулах байгууллагуудын 2013 онд хийж гүйцэтгэсэн ажил, эрүүгийн нөхцөл байдлын талаар мэдээлэл хүргэж, харилцан санал солилцож, иргэдийн сонирхсон асуултанд хариулт өгч ажилласан байна.

Ажлын хэсгүүд сумдад ажиллахдаа Гэмт хэргээс урьдчилан сэргийлэх чиглэлээр болон холбогдох хуулийн зүйл заалт, тус аймагт үйлдэгдсэн гэмт хэргийн гаралт, ялангуяа мал хулгайлах гэмт хэргээс хэрхэн урьдчилан сэргийлэх талаар мэдээлэл өгч, сургалтыг зохион байгуулсан бөгөөд уулзалт, ярилцлаганд хөдөө сумдын нийт 2436 иргэд хамрагдсан байна.

Аймгийн Прокурорын газраас дээрх ажлын хэсэгт орж ажиллахдаа Улсын Ерөнхий прокурорын газрын шинэчлэлийн бодлого зорилт, 2013 онд хийж гүйцэтгэсэн ажил, цаашид хийж хэрэгжүүлэх ажил болон хяналтын ажлын чиглэлээр тодорхой мэдээлэл хүргэж ажиллажээ.

Мөн аймгийн Боловсрол, соёлын газартай хамтран ажиллах ажлын хүрээнд хүүхдийн “Тэмүжин” театрын байранд аймгийн төвийн Ерөнхий боловсролын сургуулийн 11 дүгээр ангийн багш, сурагчдад аймгийн прокурорын туслах, Тамгын хэлтсийн дарга Д.Цогжавхлан “Эрх зүйн боловсролын хичээл”, орлогч прокурор Ч.Баярцэнгэл “Прокурорын байгууллагын гүйцэтгэх үндсэн чиг үүрэг, бүтэц зохион байгуулалт”-ын талаар сургалт явуулсны дээр Гэмт хэргээс урьдчилан сэргийлэх ажил иргэн бүрийн оролцоо чухал талаар яриа таниулга хийсэн байна.

Дээрхи сургалтанд Ерөнхий боловсролын сургуулийн 11 дүгээр ангийн 229 багш, сурагчид оролцсон ба тэдгээрээс хуульч, прокурор болохын тулд ямар шалгуур тавигддаг, Прокурорын байгууллага ямар чиг үүрэг гүйцэтгэдэг талаар сонирхсон асуултуудаа тавьж хариулт авсан байна.

Энэхүү сургалтыг зохион байгуулснаар Ерөнхий боловсролын сургуулийн төгсөх 11 дүгээр ангийн багш, сурагчид оролцсоноороо тэдэнд мэргэжлийн чиг баримжаа олоход ихээхэн чухал, ач холбогдолтой ажил боллоо гэж хамтран ажилласан 2 байгууллагын алба хаагчид дүгнэсэн байна.